ԵՐԵՎԱՆ, 9 դեկտեմբերի – Sputnik. Այսօր մի խումբ քաղաքացիներ փակել են Երևանի Մյասնիկյան պողոտան` պահանջելով վարչապետ Նիկոլ Փաշինյանի հրաժարականը։ Երևանյան ամենամեծ պողոտաներից մեկում երթևեկությունը որոշ ժամանակով կաթվածահար էր եղել։
Բողոքի ակցիա անողները նշում էին, որ նման` խաղաղ անհնազանդության ակցիաներ են անելու տարբեր վայրերում այնքան ժամանակ` մինչև չհասնեն իրենց նպատակին։
Ոստիկանները, սակայն, հորդորեցին բացել ճանապարհը` ցուցարարներին տալով 2 րոպե ժամանակ։ Սահմանված ժամկետից հետո ճանապարհը բացվեց, սակայն ճանապարհը փակողները հայտարարեցին, որ շարունակելու են այլ վայրերում նման ակցիաներ իրականացնել։
Նշենք, որ երեկ՝ ժամը 12–ին, լրացավ ընդդիմադիր գործիչների` Փաշինյանին հրաժարական տալու համար տրված ժամանակը։ ՀՅԴ Հայաստանի ԳՄ ներկայացուցիչ Իշխան Սաղաթելյանը կեսօրին ուղիղ եթերում հայտնել էր, որ Հայրենիքի փրկություն շարժումը սկսում է խաղաղ անհնազանդության ակցիաներ իրականացնել։
«Նիկոլ, դավաճան». ակցիայի մասնակիցները կոչ են անում փակել Երևանի փողոցները
Այսօր՝ ժամը 16։00-ին, ԱԺ–ի մոտ Փաշինյանի հրաժարականը պահանջող քաղաքացիները հանրահավաք են անցկացնելու։
Հիշեցնենք, որ վարչապետի հրաժարականի պահանջով բողոքի ակցիաներ են սկսվել Արցախի վերաբերյալ նոյեմբերի 9-ին եռակողմ հայտարարության ստորագրումից հետո։
