ԵՐԵՎԱՆ, 15 դեկտեմբերի - Sputnik. Շիրակի մարզի Հոռոմ և Լանջիկ գյուղերի բնակիչները պատրաստվում են փողոց փակել` գերի ընկած իրենց համագյուղացիներին վերադարձնելու պահանջով։ Այս մասին Sputnik Արմենիայի հետ զրույցում ասաց Շիրակի բնակիչ Կարապետ Պողոսյանը։
«Մեր մարզից 150 հոգի գերի է ընկել Խծաբերդի կողմերից։ Շրջափակման մեջ են եղել 3-4 օր, լրիվ մոռացության են մատնվել, իսկ հիմա գերի են։ Հոռոմի ու Լանջիկի բնակիչները պատրաստվում են ճանապարհ փակել, ես գնալու եմ նրանց մոտ, տեսնեմ` ինչ կա», – ասաց Պողոսյանը։
Հիմնականում գերեվարվել են Հոռոմ, Լանջիկ, Ազատան գյուղերի բնակիչները։ Վերջինիս գյուղապետը գալու է Երևան` հարցը տեղի իշխանությունների հետ պարզելու։
«Նոյեմբերի 9-ին ոչ թե Հայաստանի կապիտուլյացիայի, այլ լուծարման թուղթ է ստորագրվել։ Մնացել ենք ռուս խաղաղապահերի բանակցությունների հույսին։ Իհարկե, շնորհակալ ենք ռուսներին, բայց մեր պետությունը պետք է էս բոլոր հարցերով զբաղվի», – ասաց Պողոսյանը։
Հիշեցնենք` ԱՀ պաշտպանության բանակի մամուլի ծառայությունն այսօր հայտնեց, որ երեկ երեկոյան, դեռևս անհայտ պայմաններում, կորել է կապը Հադրութի Հին Թաղեր և Խծաբերդ գյուղերի ուղղությամբ տեղակայված ԱՀ ՊԲ մի քանի մարտական դիրքերի անձնակազմի հետ, ողջ գիշեր և այսօր առավոտյան շարունակվել են որոնողական աշխատանքները։ Ռուսական խաղաղապահ զորախմբի միջնորդությամբ գործուն քայլեր են իրականացվում պարզելու հայ զինվորականների գերեվարման հավանականությունը, դրա հաստատվելու դեպքում անհրաժեշտ գործողություններ ձեռնարկելու համար։
Օրեր առաջ մամուլում տեղեկություններ կային այն մասին, որ Արցախի Հադրութի շրջանի Խծաբերդ և Հին Թաղեր գյուղերի տարածքում մարտերը վերսկսվել են:
Այս գյուղերում դեկտեմբերի 11-ին և 12-ին, արդեն իսկ մարտական բախումներ էին տեղի ունեցել, որոնք դեկտեմբերի 13-ին հանգուցալուծվել էին ռուս խաղաղապահների միջամտությամբ ու տվյալ տարածքում վերահսկողություն սահմանելով։
Այս երկու գյուղերը ներկա պահին դարձյալ վերադարձվել են ադրբեջանական կողմին ու գտնվում են Ադրբեջանի ԶՈւ–ի վերահսկողության տակ։
Նշենք, որ համացանոցում արդեն իսկ տարածվել է նորացված քարտեզ, որտեղ Խծաբերդն ու Հին Թաղերը ներկայացված են որպես ադրբեջանական վերահսկողության տարածք։
Այս մասին է վկայում նաև ՌԴ ՊՆ հրապարակած նոր քարտեզը։
Հին Թաղերը կորցրել ենք, Խծաբերդում և՛ ադրբեջանցիներ կան, և՛ հայեր. Հադրութի շրջանի ղեկավար
