ԵՐԵՎԱՆ, 17 դեկտեմբերի - Sputnik. Ռուսաստանը կարող է ավելացնել խաղաղապահների թիվը Լեռնային Ղարաբաղում, եթե հակամարտության բոլոր կողմերը դա անհրաժեշտ համարեն: Այս մասին մամուլի ասուլիսում հայտարարել է Ռուսաստանի նախագահ Վլադիմիր Պուտինը: ՌԴ նախագահը բացատրել է, որ հարցը զուտ տեխնիկական բնույթ ունի:
«Եթե բոլորը գան այն եզրակացության, որ դա անհրաժեշտ է, մենք դա կանենք: Եթե ոչ, ապա չենք անի», - հավելել է ՌԴ նախագահը:
Նա նշել է, որ Լեռնային Ղարաբաղում են գտնվում ոչ միայն խաղաղապահները, այլ նաև Ռուսաստանի արտակարգ իրավիճակների նախարարության, ինչպես նաև Ռուսաստանի Դաշնության Անվտանգության դաշնային ծառայության (ФСБ) աշխատակիցները։
Ռուսաստանի նախագահը հույս է հայտնել, որ Արցախում այլևս բախումներ չեն լինի, և Հադրութի դեպքը կլինի միակ սրացումը, որ տեղի է ունեցել Արցախում ռուս խաղաղապահների ներգրավումից հետո։
Հիշեցնենք` Արցախի Հադրութի շրջանի Խծաբերդ և Հին Թաղեր գյուղերի տարածքում դեկտեմբերի 11-ին և 12-ին մարտական բախումներ էին տեղի ունեցել, որոնք դեկտեմբերի 13-ին հանգուցալուծվել էին ռուս խաղաղապահների միջամտությամբ ու տվյալ տարածքում վերահսկողություն սահմանելով։ Այս երկու գյուղերը ներկա պահին հանձնվել են ադրբեջանական կողմին։
Նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն են ընդունել ռազմական գործողությունների դադարեցման վերաբերյալ։
Պուտինը խոսել է Ղարաբաղի կարգավիճակի մասին
Եռակողմ հայտարարության համաձայն` Լեռնային Ղարաբաղի շփման գծի և Լաչինի միջանցքի երկայնքով տեղակայվել է Ռուսաստանի Դաշնության խաղաղապահ զորակազմը ՝ 1960 զինծառայողներով, հրաձգային զենքով, 90 զրահամեքենաներով, 380 միավոր ավտոմոբիլային և հատուկ տեխնիկայով:
Ռուսաստանի Դաշնության խաղաղապահ զորախումբը տեղակայմանը զուգահեռ դուրս են բերվում հայկական զինված ուժերը։ Ռուսաստանի Դաշնության խաղաղապահ զորակազմը տեղակայվում է 5 տարի ժամկետով` 5 տարվա ժամանակահատվածով ավտոմատ երկարաձգմամբ, եթե կողմերից որևէ մեկը ժամկետի ավարտից 6 ամիս առաջ չհայտարարի այդ դրույթի կիրառումը դադարեցնելու մտադրության մասին:
Ղարաբաղում խաղաղապահ գործողության գինն ու վարկանիշը. թվերն ավելի քան խոսուն են
