ԵՐԵՎԱՆ, 20 հունվարի – Sputnik. Ադրբեջանն այսօր արգելել է հայկական կողմին զոհվածների աճյունների որոնումներ կատարել։ Տեղեկությունը Sputnik Արմենիային հայտնեց Արցախի արտակարգ իրավիճակների պետական ծառայության տեղեկատվության և հասարակայնության հետ կապերի բաժնի պետ Հունան Թադևոսյանը։
«Այսօր որոնողական աշխատանքներ չեն իրականացվելու։ Ադրբեջանական կողմն արգելել է որոնողական աշխատանքներ իրականացնել հունվարի 20-ին՝ իրենց երկրում նշվող սգո օրվա կապակցությամբ: Նրանք ասացին, որ չեն ուզում, որ հայերն այդ օրը մտնեն իրենց տարածք» - ասաց Թադևոսյանը։
Նա հավելեց, որ որոնողական աշխատանքներն անհնար է իրականացնել նաև ձյան տեղումների պատճառով։
Նախորդ օրվա ընթացքում զինծառայողի մեկ մարմին է հայտնաբերվել Ջաբրայիլի տարածքում։ Նախօրեին որոնողական աշխատանքներն իրականացվել են Հադրութի, Վարանդայի (Ֆիզուլի), Ջրականի (Ջեբրաիլի), Կովսականի (Զանգելան) և Սյունիքի մարզի Մեղրի քաղաքի նախկին վարչական տարածքում։ Արդյունքում հայտնաբերվել է Ջեբրաիլի մեկ զինծառայողի դի, նրա ինքնությունը պարզելու համար նշանակվել է դատաբժշկական փորձաքննություն:
Ովքեր են դեմ պատերազմի հանգամանքներն ուսումնասող քննիչ հանձնաժողովի ձևավորմանը․ «Հրապարակ»
Նշենք, որ նոյեմբերի 13-ից մինչ օրս իրականացած որոնողական աշխատանքների արդյունքում Արցախում և Ադրբեջանի վերահսկողության տակ անցած տարածքներում հայտնաբերվել է 1247 դի, գտնվել է 9 ողջ մարդ, 7-ը զինծառայող, 2-ը քաղաքացիական անձ՝ հայր և որդի Հադրութից։
