ԵՐԵՎԱՆ, 22 հունվարի – Sputnik. Ազգային ժողովի «Լուսավոր Հայաստան» խմբակցությունը չի մասնակցի ԲԴԽ անդամի հարցով քվեարկությանը։ ԱԺ–ում լրագրողների հետ զրույցում այս մասին հայտնեց ԼՀԿ–ական պատգամավոր Տարոն Սիմոնյանը` պարզաբանելով, թե ինչու ԲԴԽ անդամների թեկնածության քննարկման ժամանակ լքեցին ԱԺ դահլիճը։
«Դատաիրավական բարեփոխումների հարցում ընդդիմության դերն անտեսվել է. ԲԴԽ ընդդիմության կողմից ներկայացված թեկնածուների մի քանի փորձերը ձախողվել են իշխանությունների կողմից։ Առանց ընդդիմության հետ քննարկումների` այսօր էլ ԲԴԽ անդամների թեկնածություն են առաջադրել»,–ասաց Սիմոնյանը։
Նա նշեց, որ մասնագիտական տեսանկյունից ներկայացված թեկնածուներից որևէ մեկի հետ խնդիր չունեն` երկուսն էլ պրոֆեսիոնալներ են։ Սակայն, ըստ Սիմոնյանի, որոշումը քաղաքական է։
Դատավորը պետք է «գողականներից», ընդդիմությունից և իշխանությունից անկախ լինի. Ջհանգիրյան
Հիշեցնենք, որ ԱԺ–ում արտահերթ նիստ է ընթանում, որի շրջանակում ԲԴԽ անդամներ են ընտրում։ Ազգային ժողովի «Իմ քայլը» խմբակցությունը Բարձրագույն դատական խորհրդի անդամի թեկնածու է առաջադրել Դավիթ Խաչատուրյանին և Գագիկ Ջհանգիրյանին։
Այդ ընթացքում ԱԺ–ի դիմաց վարչապետ Նիկոլ Փաշինյանի հրաժարականի պահանջով բողոքի ակցիա է ընթանում։
Վճռաբեկ դատարանի 9 դատավորներից 6-ը հրաժարվել են մասնակցել ԲԴԽ անդամի ընտրությանը
