ԵՐԵՎԱՆ, 2 փետրվարի – Sputnik. Հայաստանի ֆինանսական շուկայում 2021թ–ին որոշակի պասիվություն է կանխատեսվում։ Այս մասին այսօր ԿԲ–ում հրավիրված մամուլի ասուլիսի ժամանակ ասաց ՀՀ ԿԲ նախագահ Մարտին Գալստյանը` խոսելով վարկավորման ու մասնավորապես հիփոթեքային վարկերի մասին։
«Բոլորի ակնկալիքը 2021թ–ից (համեմատած 2020թ–ի հետ) ՀՆԱ–ի 7-8 տոկոս անկման շրջանակներում է։ Դա նշանակում է, որ առնվազն մեր հայրենակիցների եկամուտների նվազում ենք ունենալու։ Ու այդ պարագայում ակնկալել, որ հիփոթեքը կամ երկարաժամկետ այլ վարկերը, որոնք կապված են եկամուտների հետ, նույն թափով շարունակելու են աճել կամ լինել, ինձ թվում է` մի փոքր լավատեսական է»,– ասաց Գալստյանը։
ԿԲ նախագահը հայտնեց, որ բանկերից ստացվող ազդակների համաձայն` վարկավորման ընդհանուր ծավալն այս տարի կարող է ավելի ցածր լինել, քան 2020թ–ին էր։
Առաջարկում են կրճատել տոկոսադրույքները՝ չմտածելով ավանդատուների մասին. Սամվել Ճզմաչյան
Ասուլիսին ներկա ԿԲ Մակրոտնտեսական դեպարտամենտի տնօրեն Արմեն Նուրբեկյանն էլ նշեց, որ 2021թ–ին սպասվող փոխարժեքի հնարավոր տատանումները կարող են ազդել հիփոթեքային շուկայի վրա։
«Բայց կոնկրետ հիփոթեքային շուկայում մենք այս պահին շատ ռիսկեր չենք տեսնում»,– ասաց նա։
Վարկավորման ակտիվությունը պահելու համար, ԿԲ–ի ղեկավարության համոզմամբ, կառավարությունը պետք է փորձի տնտեսական ակտիվությունը խթանել պետական համապատասխան ծրագրերով ու որոշումներով։
Կենտրոնական բանկը դարձյալ ավելացրել է վերաֆինանսավորման տոկոսադրույքը
