Անոմալիաները շատացել են, որովհետև հորատանցքերում ջրերի քանակը, հիդրոերկրաքիմիական ջրերի միկրոէլեմենտների փոփոխությունները մի փոքր շատացել են, ինչը բնական երևույթ է մեր տարածաշրջանի համար, որը համարվում է սեյսմոակտիվ գոտի։ Sputnik Արմենիայի եթերում այս մասին ասաց «Սեյսմիկ պաշտպանության տարածքային ծառայություն» ՊՈԱԿ–ի տնօրենի ԺՊ Սոս Մարգարյանը։
«Այստեղ էական և կարևոր է մի բան` 4.7 մագնիտուդով երկրաշաժը նույնիսկ ուժեղ երկրաշարժ չէ, այլ միջին ուժի է։ Փոփոխությունները մենք տեսնում ենք և այս պահի դրությամբ էլ կատարում ենք վերլուծություններ, որոնց համաձայն` անհանգստանալու ոչինչ չունենք»,– նշեց սեյսմոլոգը։
Անդրադառնալով նույն օջախային գոտում 1933 և 1947 թվականներին տեղի ունեցած երկրաշարժերին, Մարգարյանն ընդգծեց, որ հիշյալ տարածքում կան պատմական օջախներ, որտեղ եղել են նաև շատ թույլ բազմաթիվ երկրաշարժեր, որոնք գրանցում են գործիքները, սակայն բնակչության կողմից դրանք չեն զգացվում։ Ըստ նրա` գոտին կոչվում է Փամբակ–Սյունիք Սևանի խզվածքային գոտի, որը Հայաստանի տարածքում առկա ակտիվ գոտիներից մեկն է։
«Գրանցված վերջին երկրաշարժից խուճապի մատնվելու հիմքեր չկան։ Երբ խոսում ենք սեյսմիկ ակտիվության մասին, դա դեռ չի նշանակում, որ ուժեղ երկրաշարժ է։ Կարող են գրանցվել 2.8 մագնիտուդով երկրաշարժեր, որոնք բնակչության կողմից հնարավոր է թույլ զգացվեն և կարող են լինել 3-4 բալանոց։ Եթե տեսնենք, որ պատկերը փոխվում է, ավելի վտանգավոր միտումներ կան, ապա կտարածենք հաղորդագրություն և կանենք համապատասխան քայլեր»,– նշեց սեյսմոլոգը։
Մարգարյանի տեղեկացմամբ` այս պահի դրությամբ արդեն տեղի է ունեցել մոտ 100 հետցնցում, որոնցից ընդամենը հինգն են զգացվել բնակիչների կողմից և որոնց վերաբերյալ ներկայացվել են հաղորդագրություններ։
Ըստ նրա` սեյսմիկ կենտրոնը հագեցած է տեխնիկապես, մասնագետներն աշխատելով գործիքների հետ` կատարում են նաև կանխատեսումներ տեսանելի ապագայի կտրվածքով, իսկ մենք պետք է պատրաստ լինենք միշտ և գիտակցենք, որ ապրում ենք սեյսմոակտիվ տարածաշրջանում։
Հայաստանում և հարակից տարածքներում առաջիկա օրերին կարող են կրկին երկրաշարժեր լինել. ԱԻՆ
Հիշեցնենք`փետրվարի 5-ին, ժամը 19:36-ին Գեղարքունիքի մարզի Շորժա գյուղից 5 կմ դեպի հյուսիս-արևելք, 10 կմ խորության վրա, գրանցվել էր 4.7 մագնիտուդով երկրաշարժ, որի ուժգնությունն էպիկենտրոնում, ըստ MSK-64 սանդղակի, կազմել է 6-7 բալ: Այն զգացվել էր Գեղարքունիքի մարզում 5-6 բալ ուժգնությամբ, Կոտայքի, Տավուշի, Լոռու և Արարատի մարզերի բազմաթիվ բնակավայրերում` 4-6 բալ ուժգնությամբ, իսկ Երևան քաղաքում` 3-4 բալ ուժգնությամբ։
Երկրաշարժին հաջորդել է մոտ 60 սեյսմիկ իրադարձություն՝ փետրվարի 5-ից 6-ը (ժամը 11։00-ի դրությամբ), որից 5 հատը՝ M≥2.5 (բոլորն էլ ավելի թույլ էին, քան առաջին ցնցումը):
Երկրաշարժ է գրանցվել նաև այսօր` փետրվարի 6-ին` տեղական ժամանակով ժամը 11:49-ին։ Այն զգացել են նաև Գեղարքունիքի մարզի Շողակաթ գյուղում։
