ԵՐԵՎԱՆ, 8 փետրվարի – Sputnik. Հայաստանի Հանրապետությունում ճանապարհաշինության ոլորտի ծրագրերի արդյունավետ իրականացում ապահովող «Ճանապարհային դեպարտամենտ» ՊՈԱԿ-ը հրապարակել է նախաշինարարական փուլում գտնվող հայ-վրացական «Բարեկամության կամրջի» լուսանկարը։
«Հայաստանի Հանրապետության և Վրաստանի պետական սահմանի «Սադախլո-Բագրատաշեն» անցման կետի տարածքում Դեբեդ գետի վրա կառուցվելիք նոր կամրջի վերջնական տեսքն է»,– գրված է լուսանկարին կից։
ՊՈԱԿ–ը հայտնում է նաև, որ կառուցվելու է երկու առանձին կամուրջ՝ երկու ուղղություններով իրարից 1մ հեռավորությամբ: Երկու կամուրջների ընդհանուր լայնքը կազմելու է 24.7մ, յուրաքանչյուրինը՝ 11.85մ: Կամուրջն ունենալու է մոտ 32 մետրանոց 5 թռիչք և մոտեցնող ճանապարհներ։ Կամուրջն ունենալու է արտաքին լուսավորություն և ջրահեռացման համակարգ:
Ներկայում գործող կամուրջը վերանորոգվելու է‚ այն կարող է ծառայել որպես այլընտրանքային ճանապարհ սահմանային անցակետում խցանումների ժամանակ՝ ապահովելով արագ երթևեկը:
Նոր կամրջի շինարարության մեկնարկը կտրվի առաջիկա ամիսներին։
Հիշեցնենք` այս նախագծի մասին հայտարարվել էր դեռ 2013 թվականին։ Հայաստանն այն ժամանակ սկսել էր բանակցել վրացական կողմի ու Վերակառուցման և զարգացման եվրոպական բանկի հետ։ Սկզբում նախատեսվում էր, որ կամուրջը կկառուցվի մինչ 2016 թվականը, բայց վերջնաժամկետը մի քանի անգամ հետաձգվեց։
Արդյունքում միջազգային տենդերում հաղթեց «Tunnel Sadd Ariana» իրանական ընկերությունը։ 2018թ–ի վերջին կապալառուն համաձայնագիր կնքեց հայկական ու վրացական ընկերությունների հետ։
Հայաստանում «Tunnel Sadd Ariana» իրանական շինարարական ընկերության ներկայացուցիչ Արտավազդ Բաղումյանն ավելի վաղ Sputnik Արմենիային հայտնել էր, որ տարածաշրջանի համար աննախադեպ հայ-վրացական «Բարեկամության կամուրջ» շինարարության նախագծի իրականացումը ձգձգվում է տեխնիկական պատճառներով, սակայն դա չի խանգարի կամուրջը շահագործման հանձնել 2021 թվականի աշնանը։
