ԵՐԵՎԱՆ, 18 փետրվարի – Sputnik. ՀՀ արդարադատության նախարար Ռուստամ Բադասյանը ՀՀ վարչապետ Նիկոլ Փաշինյանի որոշմամբ այսօր և վաղն աշխատանքային այցով կլինի Արցախում։ Գործուղման հրամանը հրապարակված է ՀՀ կառավարության e-gov.am տեղեկատվական հարթակում։
Բադասյանն Արցախի Հանրապետությունում կհանդիպի Արցախի Հանրապետության նախագահի, արդարադատության նախարարի և այլ պաշտոնատար անձանց հետ:
ՀՀ արդարադատության նախարարի գործուղման հետ կապված ծախսերը կկատարեվեն պետբյուջեի միջոցերից` ՀՀ արդարադատության նախարարության պահպանման համար նախատեսված արտասահմանյան պաշտոնական գործուղում հոդվածով նախատեսված միջոցների հաշվին:
«Հայաստանի Հանրապետության արդարադատության նախարար Ռուստամ Բադասյանին՝ գործուղումից վերադառնալուց հետո եռօրյա ժամկետում Հայաստանի Հանրապետության վարչապետին ներկայացնել Արցախի Հանրապետություն գործուղման արդյունքների մասին հաշվետվություն»,–նշված է որոշման մեջ:
Հավելենք, որ դեռևս Արցախում է նաև Փաշինյանի նորանշանակ օգնականը` Գագիկ Իսախանյանը:
Իսախանյանը Արցախում կլինի փետրվարի 17-ից 19-ը ներառյալ:
Վերադառնալուց հետո Իսախանյանը նույնպես գործուղման արդյունքների մասին հաշվետվություն ներկայացնի։
