ԵՐԵՎԱՆ, 20 փետրվարի - Sputnik. Արցախի և Հայաստանի սոցիալական ոլորտի պատասխանատու մասնագետներից կազմված խումբը, որը զբաղվում է արցախյան երկրորդ պատերազմի ընթացքում հաշմանդամություն ստացած անձանց կարիքների գնահատմամբ և միաժամանակ պատրաստում նրանց պրոթեզավորման, այս օրերին գտնվում է Արցախում՝ նույն աշխատանքն իրականացնելով այստեղ։ Այս մասին հայտնում են ԱՀ աշխատանքի, սոցիալական և միգրացիայի հարցերի նախարարությունից:
Նշվում է, որ աշխատանքներին իր մասնագիտական բարձր որակների և գիտելիքների ողջ ներուժով լծված է նաև Ստեփանակերտի պրոթեզավորման կենտրոնի ղեկավար Կարեն Դանիելյանը։
«Այս օրերին մասնագիտական խումբն Արցախում այցելում է պրոթեզավորման կարիք ունեցող անձանց, ծանոթանում նրանց կեցության պայմաններին, քննարկում կենսակերպի բարելավմանն ուղղված անհրաժեշտ հարցեր՝ առաջիկայում դրանք առաջնահերթորեն լուծելու նպատակով»,–նշված է հաղորդագրության մեջ։
Հավելենք, որ ԱՀ աշխատանքի, սոցիալական և միգրացիայի հարցերի նախարար Մանե Թանդիլյանն այսօր հանդիպել է մասնագիտական խմբի անդամների հետ, մանրամասն ծանոթացել նրանց կողմից իրականացվող աշխատանքներին։
Թանդիլյանը շեշտել է, որ հաշմանդամություն ստացած քաղաքացիները լինելու են պետության հատուկ հոգածության ներքո, և նրանց առօրեական ամենատարրական խնդիրներն անգամ պետք է համարժեք լուծումներ ունենան։
Հիշեցնենք` 2020թ.–ի սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում սկսեց արցախա–ադրբեջանական սահմանի ողջ երկայնքով։ Նոյեմբերի 9-ին ՀՀ վարչապետ Նիկոլ Փաշինյանի, ՌԴ նախագահ Վլադիմիր Պուտինի ու Ադրբեջանի նախագահ Իլհամ Ալիևի միջև ստորագրված հայտարարության համաձայն` ռազմական գործողությունները դադարեցվեցին։
Անհետ կորածների, գերիների ու վիրավորների թվի մասին պաշտոնական տվյալներ չկան։
Ինչո՞ւ են ադրբեջանցիներն ուրախացել․ ռուսական խաղաղապահների հրամանատարի կենսագրությունը
