ԵՐԵՎԱՆ, 25 փետրվարի - Sputnik. ԱԺ «Իմ քայլը» խմբակցությունը միանում է Փաշինյանի կազմակերպած երթին։ Այս մասին խորհրդարանից տեղեկացնում է Sputnik Արմենիայի թղթակիցը։
Նրա տեղեկություններով, այս պահին իշխող խմբակցությունը դուրս է գալիս խորհրդարանի շենքից ու որոշում է կայացրել միանալու ՀՀ վարչապետ Փաշինյանի կազմակերպած երթին ու դրան հետևող հանրահավաքին։
Հիշեցնենք, մինչ այդ իշխող խմբակցությունը խորհրդարանում խմբակցության նիստ էր հրավիրել` քննարկելու Հայաստանում ստեղծված ներքաղաքական իրավիճակը։
ՀՀ ԶՈւ Գլխավոր շտաբն այսօր` փետրվարի 25-ին, պահանջեց ՀՀ վարչապետ Նիկոլ Փաշինյանի հրաժարականը, ասելով, որ քաղաքական ղեկավարությունը պետությունը տանում է դեպի վտանգավոր սահմանագիծ։ Դա տեղի ունեցավ այն բանից հետո, երբ վարչապետը պաշտոնից հեռացրեց Գլխավոր շտաբի պետի առաջին տեղակալ Տիրան Խաչատրյանին։
Ի պատասխան Նիկոլ Փաշինյանը հայտարարեց ռազմական հեղաշրջման փորձի մասին և քաղաքացիներին կոչ արեց հավաքվել Հանրապետության Հրապարակում՝ «հեղափոխությունը պաշտպանելու» համար։
Նա հայտնեց նաև, ստորագրել է Գլխավոր շտաբի պետ Օնիկ Գասպարյանին պաշտոնից հեռացնելու փաստաթուղթը, որը, սակայն, դեռ չի ստորագրել ՀՀ նախագահ Արմեն Սարգսյանը։
