ԵՐԵՎԱՆ, 27 փետրվարի - Sputnik. Եվրոպական միությունն արձագանքել է Ադրբեջանի նախագահ Իլհամ Ալիևի` ռազմագերիների մասին հայտարարությանը` կոչ անելով հետևել միջազգային մարդասիրական իրավունքին ու լիարժեք իրականացնել Լեռնային Ղարաբաղի վերաբերյալ 2020 թվականի նոյեմբերի 9-ի հրադադարի մասին համաձայնագրի ռազմագերիների փոխանակման եւ մարդկային աճյունների վերադարձի մասին դրույթները:
«Եթե օտարերկրյա գրոհայինները դեռևս շարունակում են մնալ տարածաշրջանում, ապա պետք է արագ և ամբողջությամբ դուրս բերվեն: ԵՄ-ն կոչ է անում բանակցություններ վարել հակամարտության համապարփակ և կայուն կարգավորման շուրջ, որը տանում է դեպի տարածաշրջանում տևական խաղաղության»,- ասված է հայտարարության մեջ։
Հիշեցնենք` փետրվարի 26-ին Ալիևը հայտարարել էր, որ Բաքուն բոլոր ռազմագերիներին է հանձնել Երևանին:
«Մենք նրանց վերադարձրեցինք բոլոր գերիներին և զոհված զինծառայողների մարմինները: Պատերազմից հետո նրանց վերադարձվեց ավելի քան 1000 դիակ», - ասել էր նա՝ ավելացնելով, որ Ադրբեջանում հիմա միայն հայ դիվերսանտներ են մնացել:
Նշենք, որ մինչ օրս Հայաստան է վերադարձել 69 գերի (այդ թվում՝ քաղաքացիական անձինք)։ Պաշտոնական տվյալներ չկան, թե քանի գերի ունենք ադրբեջանական կողմում, սակայն 2020թ. նոյեմբերի 9-ի եռակողմ հրադադարի մասին հայտարարությունը ստորագրելուց գրեթե չորս ամիս անց, ոչ պաշտոնական տվյալներով, մինչև 300 հայ ռազմագերիներն ու պատանդները դեռ շարունակում են մնալ գերության մեջ։
Ադրբեջանը փորձում է գերիների հարցը սակարկել. ՀՀ փոխվարչապետի խոսնակ
