ԵՐԵՎԱՆ, 27 փետրվարի - Sputnik. «ՎԵՏՕ» շարժման ղեկավար Նարեկ Մալյանին քիչ առաջ նոր մեղադրանք է առաջադրվել։ Այս մասին նա հայտնել է Facebook-ում կատարած գրառման մեջ։
«Քիչ առաջ քննչականի ծանր հանցագործությունների քննության բաժնում գրավոր բացատրեցին, որ «մահ դավաճաններին» կոչը բռնության սպառնալիք է Նիկոլ Փաշինյանի դեմ և ինձ առաջադրեցին մեղադրանք ՀՀ քրեական օրենսգրքի 226.2 հոդվածով: Հերթական անգամ»,– գրել է Մալյանը։
Հիշեցնենք` փետրվարի 21-ին Նարեկ Մալյանին ձերբակալել էին «Չաուշեսկուի գնդակահարությունը կամ մահ դավաճաններին» ֆուտուրիստական ներկայացումը Ազատության հրապարակում բեմադրելու փորձի մեղադրանքով:
Երեկ` փետրվարի 26-ին ներկայացումը բեմադրվեց Բաղրամյան պողոտայում։ Իշխանությունն այդ անգամ չխոչընդոտեց դրա իրականացմանը։
Նույն օրը ՀՀ ՄԻՊ Արման Թաթոյանը խիստ դատապարտեց Բաղրամյան պողոտայում անցկացվող հավաքի ժամանակ մահապատժի բեմականացված ցուցադրումը:
Ըստ Թաթոյանի, նման երևույթներն ակնհայտ ասոցացվում են բռնության հետ, ստեղծում են բռնությունն արդարացնելու տպավորություն և ակնհայտորեն չեն բխում հավաքի խաղաղ նպատակներից, ուստի չեն կարող թույլատրելի լինել, այն էլ այս լարված օրերին։
Նշենք, որ ներկայացման մեջ ներկայացվում է Ռումինիայի նախկին նախագահ Չաուշեսկուի ու նրա կնոջ գնդակահարությունը։
1989 թվականի դեկտեմբերի 17-ին, երբ Չաուշեսկուն անվտանգության ուժերին կարգադրեց կրակ բացել հակակառավարական ցույցի մասնակցիների վրա, երկրի կոմունիստական կառավարությունը վերջնականորեն տապալվեց։ Ռեժիմի դեմ պայքարը հետագայում ձեռք բերեց զանգվածային բնույթ՝ հասնելով մինչև մայրաքաղաք Բուխարեստ։ Միայն Բուխարեստում սպանվեց 89 մարդ, իսկ ողջ Ռումինիայում զոհվածների թիվը գերազանցեց 1000-ը:
Նարեկնե՛ր, եղեք պատրաստ. ոստիկանները բերման են ենթարկել Նարեկ Մալյանին և Նարեկ Սամսոնյանին
Հաջորդ օրը ռումինական բանակն անցավ համաժողովրդական շարժման կողմը։ Չաուշեսկուն կնոջ՝ Ելենա Պետրեսկուի հետ փորձեց ուղղաթիռով հեռանալ մայրաքաղաքից, սակայն ճանապարհին ամուսինները գերեվարվեցին զինված ուժերի կողմից։ Զինվորական հատուկ տրիբունալի կողմից դեկտեմբերի 25-ին անցկացվեց հապշտապ դատավարություն՝ Չաուշեսկուին մեղադրելով սեփական ժողովրդի ցեղասպանության, ժողովրդի և պետության դեմ զինված հարձակման, ազգային ինստիտուտների վերացման և երկրի տնտեսության թուլացման (սաբոտաժի) մեջ։ Ամուսինները դատապարտվեցին մահապատժի ու գնդակահարվեցին։
