ԵՐԵՎԱՆ, 12 մարտի - Sputnik. Հայաստանի առողջապահության նախարարությունը կորոնավիրուսի համավարակով պայմանավորված սահմանափակումները խստացնելու առաջարկ չի ներկայացրել: Ավելին, այս փուլում նման հարց նույնիսկ չի էլ քննարկվում։ Այս մասին Sputnik Արմենիայի հետ զրույցում ասաց ՀՀ առողջապահության նախարարության մամուլի խոսնակ Հռիփսիմե Խաչատրյանը:
Նշենք, որ սոցիալական կայքերում ու Տելեգրամ ալիքներում տեղեկություններ են տարածվել այն մասին, որ Փաշինյանը հանձնարարել է մարտի 15-ից կորոնավիրուսի վիճակի վատթարացման հիմքով Հայաստանում դարձյալ արտակարգ դրություն հայտարարել ու այդ պատրվակով արգելել հավաքները։ Ըստ տեղեկությունների` երկիրը կվերադառնա խիստ սահմանափակումների ռեժիմի («լոքդաուն»)՝ օնլայն դասապրոցեսով, հանրային վայրերում աշխատանքի արգելքով:
«Նման հարց չի քննարկվում: Այս պահին մենք խոսում ենք միայն իրավիճակի լարվածության մասին` կապված կորոնավիրուսային վարակի հայտնաբերված դեպքերի օրական աճի հետ», - Sputnik Արմենիայի հարցին ի պատասխան ասաց Հռիփսիմե Խաչատրյանը:
Նրա խոսքով` նախարարությունը շարունակում է քաղաքացիներին հորդորել զգուշավորություն ցուցաբերել և պահպանել հակահամաճարակային կանոնները `դիմակ դնել, սոցիալական հեռավորություն պահել ու ախտահանել ձեռքերը:
Նշենք, որ այսօր` մարտի 12–ին հրպարակված տվյալների համաձայն` Հայաստանում կորոնավիրուսով վարակվածների թիվը վերջին մեկ օրում ավելացել է 818–ով։
Հիշեցնենք` 2020թ.–ի մարտի 16–ից Հայաստանում արտակարգ դրություն էր սահմանված, որը մի քանի անգամ երկարաձգվեց և տևեց մինչև սեպտեմբերի 11–ը։ Երկարաձգված արտակարգ դրության պայմանները որոշակի փոփոխությունների ենթարկվեցին։
Տնտեսական շատ գործունեություններ թույլատրվեցին, բայց սահմանվեցին պարտադիր պահանջներ։
Հանրային բաց տարածքներում դիմակ դնելը պարտադիր էր։ Դիմակ կարող էին չդնել միայն մինչև 6 տարեկան երեխաները, հեծանիվ վարողները, ֆիզիկական վարժություններ անողները և խրոնիկ շնչառական հիվանդություններ ու սրտային անբավարարություն ունեցողները։
2020թ.–ի սեպտեմբերի 11–ին ՀՀ կառավարությունը որոշեց, որ երկրում սեպտեմբերի 12–ից մինչև 2021թ.–ի հունվարի 11–ը կգործի կարանտինի ռեժիմ։ Որոշ սահմանափակումներ մեղմացվեցին, բայց հասարակական վայրերում դիմակ դնելու պահանջը շարունակեց գործել։
Հաշվի առնելով կորոնավիրուսի 3–րդ ալիքի գոյությունն աշխարհում և այն փաստը, որ Հայաստանում վարակակիրների թիվը շարունակում է բարձր մնալ` 2021թ.–ի հունվարի 11–ին ՀՀ կառավարությունը որոշեց երկրում կարանտինային ռեժիմը երկարաձգել ևս 6 ամսով։ Այն կտևի մինչև 2021թ.–ի հուլիսի 11–ը։
Դպրոցականները պետության հաշվին կապահովվեն բժշկական դիմակներով ու ախտահանիչներով
