ԵՐԵՎԱՆ, 13 մարտի – Sputnik. ՀՀ վարչապետ Նիկոլ Փաշինյանին հաջողվեց աննկատ հեռանալ ՀՀ նախագահի նստավայրից։ Այս մասին նստավայրի հետնամուտքի մոտ հավաքված ցուցարարներին հայտնեց ակցիայի կազմակերպիչներից մեկը` ՀՅԴ անդամ Գերասիմ Վարդանյանը։
«Ինչ–որ հետնամուտքով, ինչ–որ տնտեսական մուտքով, ինչ–որ գաղտնի ճանապարհով իրեն դուրս են բերել նախագահականից»,– ասաց նա։
Վարդանյանը հայտարարեց, որ հավաքի մասնակիցները շարունակում են մնալ փողոցում, մինչև իրենց վերջնական նպատակի իրականացումը` վարչապետի հրաժարականը։
«Սա մեսիջ է ՀՀ ոստիկանությանը, որ տեսնեն, թե իրենց ինչպես է օգտագործում, որ կարողանա իրենց թիկունքով տեղաշարժվել։ Սա մեսիջ է միջազգային հանրությանը, որ տեսնեն, թե ով է ՀՀ ղեկավարը։ Նա մեզ չի ներկայացնում, նա ՀՀ քաղաքացու հետ ոչ մի կապ չունի»,– ասաց Վարդանյանը։
Այս հայտարարություններից հետո ցուցարարները վերադարձան Բաղրամյան պողոտա։ Իսկ հավաքի կազմակերպիչները հայտարարեցին, որ այսքանով ավարտում են այսօրվա ակցիաները։
Հիշեցնենք` Հայրենիքի փրկության շարժման համակիրներն այսօր հավաքվել էին ՀՀ կառավարության 2-րդ մասնաշենքի դիմաց՝ խոչընդոտելու ՀՀ վարչապետ Նիկոլ Փաշինյանի մուտքը ԱԳՆ շենք։
Բանն այն է, որ Փաշինյանը մարտի 2-ին` Դիվանագետի օրը, խախտելով ՀՀ գործադիր իշխանությունում ձևավորված ավանդույթը, ԱԳՆ չէր այցելել։ Փոխարենը նա որոշել է ԱԳՆ աշխատակիցների հետ հանդիպել այսօր։ Ընդդիմությունն էլ նախապես հայտարարել էր, որ փորձելու է փակել վարչապետի ճանապարհը։ Կառավարության մասնաշենքի շրջակայքում մեծ քանակությամբ ոստիկանական ուժեր էին կուտակվել, նախարարության շենքի ու հարակից մի քանի շենքերի գլխին դիպուկահարներ էին տեղակայվել։
ՀՅԴ համահայկական երիտասարդական միության կենտրոնական վարչության անդամ Գոռ Սարգսյանն ավելի ուշ հայտարարեց, որ Փաշինյանի հանդիպումը նախատեսված էր 12:30-ին, բայց նա ժամանել է դրանից մեկ ժամ շուտ։ Ցուցարարները երթով գնացին Բաղրամյան պողոտա, որտեղ այսօր կայանալու է ՀՀ նախագահ Արմեն Սարգսյանի և Նիկոլ Փաշինյանի հանդիպումը։
Հայաստանում Նիկոլ Փաշինյանի հրաժարականի պահանջով բողոքի ակցիաները սկսվել են նոյեմբերի 9-ին եռակողմ հայտարարության ստորագրումից հետո։ Ներքաղաքական իրավիճակն ավելի սրվեց ԶՈւ գլխավոր շտաբի շուրջ ծավալված իրադարձություններից հետո։
