ԵՐԵՎԱՆ, 16 մարտի - Sputnik. Նախորդ 3-4 ամիսները ՀՀ երկրորդ նախագահ Ռոբերտ Քոչարյանի համար առաջին հերթին հատկանշական էին բազմաթիվ հանդիպումներով՝ զինակիցների, քաղաքական ու հասարակական գործիչների, փորձագիտական հանրույթի, երիտասարդության, լրագրողների, բժիշկների, մշակույթի գործիչների, սփյուռքի մեր հայրենակիցների հետ։ Քոչարյանը նման գրառում է արել Facebook–ի իր էջում։
«Հանդիպել ենք տարբեր առիթներով՝ գործով կամ ինչ-որ հանգամանքների բերումով, գրասենյակում, դատարանի մոտ, նույնիսկ երևանյան փողոցներում, Ծաղկաձորում, ինքնաթիռում։ Զրուցել ենք քաղաքականությունից, ղարաբաղյան պատերազմից, անցյալից, բայց առավելագույնը՝ Հայաստանի ապագայի մասին»,–նշված է գրառման մեջ։
Քոչարյանը հավելել է, որ իրենց հայրենիքը սիրող մարդիկ ամրապնդել են վստահությունն առ այն, որ միասին կարող են բուժել վերքերը և նորից վերականգնել երկիրը։
Հիշեցնենք, որ մարտի 4-ին ռուսական լրատվամիջոցների համար կայացած մամուլի ասուլիսի ժամանակ պատասխանելով Sputnik Արմենիայի հարցին` Քոչարյանը նշել էր, որ ինքը չի ընկալվում որպես կուսակցական առաջնորդ, հավանաբար չի ստեղծի քաղաքական կուսակցություն, չնայած չի բացառում այդ տարբերակը։ Երևի կլինեն քաղաքական կուսակցություններ, որոնք կհամագործակցեն իր հետ հավանական ընտրությունների ժամանակ։
Ի դեպ, այսօր` ժամը 13։00-ին, Երևանի ընդհանուր իրավասության դատարանում կկայանա Քոչարյանի և մյուսների դեմ հարուցված քրգործով հերթական նիստը։
Լևոն Տեր-Պետրոսյանը Փաշինյանին առաջարկում է ժամանակավորապես ապաստանել արտերկրում
