ԵՐԵՎԱՆ, 12 ապրիլի – Sputnik. Հայաստանում Ռուսաստանի դեսպան Սերգեյ Կոպիրկինը կարծում է, որ Հայաստանի վարչապետ Նիկոլ Փաշինյանի առաջարկով նոր ԱԷԿ-ի կառուցման վերաբերյալ քննարկումներ են ընթանում: Նա այդ մասին ասաց Sputnik Արմենիայի թղթակցի հետ զրույցում։
Ավելի վաղ մոսկովյան այցի ընթացքում Փաշինյանը ՌԴ նախագահ Վլադիմիր Պուտինին առաջարկել էր դիտարկել Հայաստանում նոր ատոմային էլեկտրակայանի կառուցման հնարավորությունը:
«Ընթացիկ տարին շատ կարևոր է ատոմակայանի գործողության ժամկետի երկարաձգման աշխատանքների ավարտի, աշխատանքի ժամկետի առումով», - ասաց Կոպիրկինը:
Նա կարծում է, որ զուգահեռաբար քննարկումներ են ընթանում այդ ոլորտում հետագա փոխգործակցության, այդ թվում՝ նշված թեմայի շուրջ:
Հիշեցնենք` ՀՀ տարածքային կառավարման և ենթակառուցվածքների նախարար Սուրեն Պապիկյանը հայտարարել է, որ մինչև 2040 թվականը Հայաստանի էներգետիկայի զարգացման ռազմավարական ծրագրի հիմնական նպատակը նոր ատոմակայանի կառուցումն է, ինչը, կառավարության երկարաժամկետ նպատակներին համապատասխան, թույլ կտա հասնել CO2-ի արտանետումների ամենացածր մակարդակի:
Հայկական ԱԷԿ-ը, որը միակն է Հարավային Կովկասի տարածքում, արտադրում է Հայաստանում արտադրվող ողջ էլեկտրաէներգիայի ավելի քան մեկ երրորդը: Ատոմային էներգետիկայի ոլորտում Ռուսաստանի և Հայաստանի առանցքային նախագիծը հայկական ԱԷԿ-ի երկրորդ էներգաբլոկի շահագործման ժամկետի երկարաձգման և արդիականացման նախագիծն է:
Հրազդանի ՋԷԿ-ի 5-րդ էներգաբլոկի աշխատանքը դադարեցվել է. կայանի նորոգման գումար չկա
