ԵՐԵՎԱՆ, 3 մայիսի - Sputnik. Գնում ենք արտահերթ ընտրությունների, որպեսզի հասկանանք, թե ՀՀ քաղաքացիներն ինչ են ուզում։ Այսօր ԱԺ–ում, վարչապետի թեկնածության քվեարկությունից առաջ ասաց ԱԺ «Լուսավոր Հայաստան» խմբակցության ղեկավար Էդմոն Մարուքյանը` շեշտելով, որ այսօրվա ընտրությունը օրենքից բխող ձևական գործընթաց է։
«Ձեռք բերված պայմանավորվածություններն ըստ էության գործում են, որևէ շեղում չի եղել խորհրդարանի արձակման հետ կապված»,– ասաց Մարուքյանը` նշելով, որ խորհրդարանական ուժերն այսօր վարչապետի իրենց թեկնածուները չեն առաջադրելու, բայց դա չի նշանակում, թե իրենք թեկնածու չունեն։ Իրենց թեկնածուներով նրանք կմասնակցեն արդեն արտահերթ ընտրություններին։
Մարուքյանը նաև նշեց, որ ԼՀԿ–ն հայտարարության տեքստ է մշակել, որում կոչ է անում քարոզարշավի ժամանակ ձեռնպահ մնալ ատելության խոսքից։ Մարուքյանը բոլոր քաղաքական ուժերին կոչ արեց միանալ իրենց հայտարարությանը։
