Դատելով այս օրերին հնչած և մինչ այդ արված հայտարարություններից` Իրանը բավականին անհանգստացած է հայ-ադրբեջանական սահմանին ստեղծված իրավիճակով։ Sputnik Արմենիայի հետ զրույցում նման կարծիք հայտնեց իրանագետ Գարիկ Միսակյանը։
«Իրանի ԱԳՆ մամուլի խոսնակի հայտարարությունը կողմերին խաղաղ ճանապարհով լուծելու կոչ էր և չէր տեղավորվում մինչ այդ Զարիֆի կողմից հնչեցրած այն հայտարարությունների մեջ, որ միջազգայնորեն ճանաչված հայկական սահմանն Իրանի համար կարմիր գիծ է հանդիսանում»,- ասաց նա։
Այս հայտարարություններին հաջորդեց Իրանի ԱԺ ազգային անվտանգության և արտաքին քաղաքականության մշտական հանձնաժողովի նախագահ Մոջթաբա Զոլնուրիի հայտարարությունը, որն, ըստ իրանագետի, ավելի կոշտ հռետորաբանություն էր պարունակում Ադրբեջանի դեմ` հայկական սահմանը խախտելու և դրա հետևանքների վերաբերյալ։
«Իհարկե սա կարող ենք դիտարկել որպես միջազգային լսարանին և հատկապես Ադրբեջանին ու նրան սատարող տարածաշրջանային մյուս պետություններին ուղղված կոչ»,- նշեց Միսակյանը։
Նույն հայտարարության մեջ իրանցի պաշտոնյան անդրադարձել է նաև տարածաշրջանում ահաբեկիչների ներկայությանը և հայտարարել, որ պաշտոնական Թեհրանը խստորեն պատժելու է նրանց կողմից իրանական սահմանին ցանկացած ոտնձգություն։
Նրա խոսքով`հայ-իրանական սահմանի անխափան աշխատանքի մասին հայտարարությունը կարող է միտված լինել նաև Մեղրիի կամ այսպես կոչված «Զանգեզուրի միջանցքի» գործարկմանը, ինչն Ադրբեջանի կողմից մշտապես շեշտվում է։
Հայաստանը կարող է դառնալ բավականին հետաքրքիր հարթակ ռուս–իրանական համագործակցության համար
«Իրանական կողմը գիտակցում է, որ ադրբեջանական այս գործողությունները կարող են ճնշում լինել հենց «Զանգեզուրի միջանցքի» գործարկման համար, այսինքն` Իրանը մի քանի կողմից մեսիջներ է ուղարկում ոչ միայն Ադրբեջանին, այլ տարածաշրջանային մյուս պետություններին` Ռուսաստանին, Հայաստանին, Թուրքիային»,- հավելեց իրանագետը։
Նշենք, որ Իրանի ԱԺ ազգային անվտանգության և արտաքին քաղաքականության հանձնաժողովի նախագահ Մոջթաբա Զոլնուրին, անդրադառնալով հայ-ադրբեջանական սահմանին ստեղծված իրավիճակին և Ադրբեջանի զինված ուժերի կողմից ՀՀ տարածք ներխուժելու դեպքին, հայտարարել է, որ Իրանը չի ընդունում տարածաշրջանի որևէ փոփոխություն, և տարածաշրջանի երկրների տարածքային ամբողջականությունը պետք է պահպանել:
