ԵՐԵՎԱՆ, 20 մայիսի – Sputnik. ՀՀ վարչապետի պաշտոնակատար Նիկոլ Փաշինյանը Facebook–ի իր էջում գրել է, որ կառավարության գործողություններում չկա և չի կարող լինել որևէ դավադրություն։
«Ասք այն մասին, թե ինչպես են իրենց «ընդդիմադիր» հորջորջող որոշ շրջանակներ ամեն ինչ անում, որ ադրբեջանցի զինվորները չլքեն Հայաստանի տարածքը և գալարվում են այն մտքից, որ իրենց երազած պատերազմը չի սկսվում, առավելևս այն մտքից, որ կառավարության գործողություններում չկա և չի կարող լինել որևէ դավադրություն»,– շեշտել է նա։
Փաշինյանը խոստացել է այդ թեմայով ավելի մանրամասն հայտարարություն անել այսօր երեկոյան:
Հիշեցնենք` Վատիկանում ՀՀ նախկին դեսպան Միքայել Մինասյանը մայիսի 19–ին Facebook–ում գրել էր, որ ավարտվել է Հայաստանի և Ադրբեջանի միջև կնքվելիք նոր հայտարարության փաստաթղթի ձևակերպման աշխատանքը։
«Ահա փաստաթուղթը, որի մասին գրել էի». Միքայել Մինասյանը լուսանկար է հրապարակել
Նրա խոսքով` այդ փաստաթղթում դիվանագիտորեն, գեղեցիկ ձևակերպումներով, ըստ էության, ձևակերպվում է նոր դեմարկացիան՝ Հայաստանի համար աղետալի հետևանքներով։
Ըստ Մինասյանի` դեմարկացիան հիմնված է լինելու երեք սկզբունքի հիման վրա՝ ԽՍՀՄ քարտեզների, աշխարհագրական նպատակահարմարության և այդ պահին եղած իրական պատկերի։ Սրա հետևանքով, ըստ նրա, Նիկոլ Փաշինյանը քննարկման առարկա է դարձրել Տավուշի մարզի 5 գյուղերը և Արարատի մարզի մեկ գյուղն Ադրբեջանին հանձնելը։
Իսկ այսօր կառավարության նիստում Փաշինյանը հայտարարեց, որ պատրաստվում է ստորագրել այդ փաստաթուղթը։
ՀՀ ԱԺ–ն այսօր` 18։00-ին, արտահերթ նիստ է գումարելու։ Չի բացառվում, որ Փաշինյանը խոստացած հայտարարությամբ հանդես գա հենց այդ ժամանակ։
