ԵՐԵՎԱՆ, 21 մայիսի - Sputnik. Հայ-ռուսական բազմակողմ համագործակցությունն ու դաշնակցային հարաբերությունների զարգացումը չունի որևէ այլընտրանք: Նման կարծիք է հայտնել ԲՀԿ նախագահ Գագիկ Ծառուկյանը` ՌԴ Պետական Դումայում հանդիպման ժամանակ։
Ծառուկյանի գլխավորած պատվիրակությունը ՌԴ Պետական Դումայում հանդիպում է ունեցել Պետական Դումայի փոխնախագահ Պյոտր Տոլստոյի, Պետական Դումայի «Եդինայա Ռոսիա» խմբակցության ղեկավար Սերգեյ Նևերովի և ՌԴ Պետական դումայի ԱՊՀ գործերով, եվրասիական ինտեգրման և հայրենակիցների հետ կապերի կոմիտեի նախագահի տեղակալ Կազբեկ Տայսաևի հետ:
«ՌԴ-ն Հայաստանի գլխավոր դաշնակիցն է քաղաքական, տնտեսական ու անվտանգային հարցերում»,-նշել է Ծառուկյանը:
Նա առանձնացրել է հատկապես անվտանգային մարտահրավերները, որտեղ առանցքային է որակել Ռուսաստանի դերակատարությունն անվտանգային միջավայրի բարելավման գործում:
Հանդիպման ընթացքում հատուկ անդրադարձ է կատարվել նաև տարբեր միջազգային խորհրդարանական հարթակներում հայ և ռուս խորհրդարանականների գործակցության արդյունավետության բարձրացմանն ուղղված քայլերի անհրաժեշտության վերաբերյալ հարցին:
Ծառուկյանն ուզում է մարդկանց մատից փուշ հանել. ինչ է առաջարկում նա
Հիշեցնենք, որ օրերս` մայիսի 17-ին, ԲՀԿ առաջնորդ Գագիկ Ծառուկյանը հանդիպում է ունեցել Հայաստանի Հանրապետությունում ՌԴ արտակարգ և լիազոր դեսպան Սերգեյ Կոպիրկինի հետ: