ԵՐԵՎԱՆ, 22 մայիսի - Sputnik. ՀՀ երկրորդ նախագահ Ռոբերտ Քոչարյանը Facebook–ում գրառում է արել` հայտնելով, որ արդեն մի քանի օր է՝ իրեն տեղեկություններ են հասնում, որ իր թիմակիցների հանդեպ առանձին տեղերում իրավապահ համակարգի կողմից ճնշումներ են սկսվել։
«Ես կարող եմ ներել իմ հանդեպ թույլ տրված ապօրինությունները և անարդարությունը՝ հանուն պարտության էջը փակելու գաղափարի, հանուն ազգային համերաշխության։ Բայց ուզում եմ զգուշացնել, որ թիմակիցներիս հանդեպ շինծու հետապնդման որևէ դեպք մոռացության չի մատնվելու ու չի ներվելու։ Վստահեցնում եմ, որ անօրինականություն թույլ տված ցանկացած պաշտոնյա շատ շուտով պատասխան է տալու օրենքի առաջ»,– գրել է Քոչարյանը։
Փաշինյանի լիազորությունների ապօրինի կատարումը պետք է դադարեցվի. «Հայաստան» դաշինք
Հիշեցնենք` Ռոբերտ Քոչարյանը, ՀՅԴ-ն ու «Վերածնվող Հայաստանը» մայիսի 9-ին համագործակցության հռչակագիր ստորագրեցին։ Հուշագրին միացած քաղաքական ուժերը հայտարարեցին, որ ԱԺ արտահերթ ընտրություններին մասնակցելու են «Հայաստան» դաշինքով։
Մայիսի 19-ին «Հայաստան» դաշինքի նախընտրական կենտրոնական շտաբի պաշտոնական ներկայացուցիչ Արամ Վարդևանյանը հայտարարեց, որ ոստիկանության առանձին ծառայողներ առանց որևէ հիմնավորման ներս են մտել «Հայաստան» դաշինքի մարզային շտաբներ և հետաքրքրվել շտաբի ցուցանակի, շտաբի կազմակերպչական այլ հարցերի մասին։
Ավելի ուշ ոստիկանությունը պարզաբանեց, որ իրենց տարածքները սպասարկող ոստիկանության ծառայողներն այցելում են բոլոր նախընտրական շտաբներ, շտաբի պետերին հանձնում անձնական տվյալներով իրենց այցեքարտերը ու խնդրում նրանց կոնտակտային տվյալները՝ անհրաժեշտության դեպքում համագործակցելու նպատակով:
