ԵՐԵՎԱՆ, 26 մայիսի - Sputnik. Հայաստանի Հանրապետության նախագահ Արմեն Սարգսյանը շնորհավորական ուղերձ է հղել Վրաստանի նախագահ Սալոմե Զուրաբիշվիլիին ազգային տոնի՝ Պետական անկախության վերականգնման օրվա առթիվ։ Տեղեկությունը հայտնում է ՀՀ նախագահի մամուլի ծառայությունը։
Սարգսյանն ընդգծել է, որ հայ և վրացի ժողովուրդները դարեր շարունակ առաջնորդվել են բարիդրացիական հարաբերությունները պահպանելու, սերտ համագործակցությունը շարունակելու և ամրապնդելու սկզբունքներով:
«Գոհունակությամբ պետք է նշեմ, որ այսօր էլ Հայաստանն ու Վրաստանը շարունակում են հետևողական հոգատարությամբ վերաբերվել երկու երկրների միջև ձևավորված բազմաշերտ հարաբերություններին: Ուրախ եմ, որ Վրաստան կատարած իմ պաշտոնական այցի ընթացքում հնարավորություն ունեցանք քննարկելու մեր երկրների գործակցության խորացմանն ու զարգացմանը վերաբերող հարցեր»,- ասվում է ՀՀ նախագահի շնորհավորական ուղերձում:
Նա շեշտել է, որ որպես տարածաշրջանի երկու հարևան և բարեկամ պետությունների նախագահներ` իրենք հանձնառու են նվիրումով և պատվով ծառայել իրենց ժողովուրդներին և շարունակել համատեղ ջանքերը՝ հաջորդ սերունդներին փոխանցելու նախնիներից ժառանգություն ստացած բարեկամական հարաբերությունները։
Հիշեցնենք` 2021 թվականին լրանում է Վրաստանի Ժողովրդավարական Հանրապետության 103-րդ տարեդարձը և Խորհրդային Միությունից անկախության վերականգնման 30-ամյակը:
