ԵՐԵՎԱՆ, 26 մայիսի - Sputnik. ՀՀ պաշտպանության նախարարի պաշտոնակատար Վաղարշակ Հարությունյանը մոտ ժամանակներում կմեկնի Մոսկվա։ Այդ մասին Ազգային ժողովում կառավարության հետ հարցուպատասխանի ժամանակ հայտարարեց ՀՀ վարչապետի պաշտոնակատար Նիկոլ Փաշինյանը։ ՌԴ մայրաքաղաքում բանակցությունների թեմաներից է լինելու իրավիճակը հայ-ադրբեջանական սահմանին՝ Սյունիքում ու Գեղարքունիքում։
«Կարծում եմ՝ մենք պետք է մի քանի հարցի պատասխան ստանանք։ Եվ պետք է շարունակենք խորացնել համագործակցությունը ՀԱՊԿ-ի ու դաշնակից Ռուսաստանի հետ»,-ասաց Փաշինյանը։
Հիշեցնենք, որ մայիսի 12-ից, երբ ադրբեջանական զինուժի ծառայողները Գեղարքունիքի ու Սյունիքի հատվածում մի քանի կմ առաջ եկան ՀՀ տարածք՝ հայ-ադրբեջանական մի քանի բանակցություններ են ընթացել ռուսական կողմի միջնորդությամբ։ Հակառակորդը որոշ հատվածներից հետ է քաշվել, սակայն չի շտապում ամբողջովին հեռանալ ՀՀ ինքնիշխան տարածքից։
Հայաստանը դիմել է ՀԱՊԿ-ին ու Ռուսաստանից ռազմական օգնություն է խնդրել։ Ռազմաքաղաքական ղեկավարությունը հայտարարել է, որ ցանկանում է խնդիրը խաղաղ ճանապարհով լուծել, բայց պատրաստ է ուժային տարբերակի, եթե բանակցություններն արդյունք չտան։
Մինչև Ադրբեջանը ՀՀ–ի տարածքից չհեռանա, բանակցություններ չեն լինի. Ավինյան
Հիշեցնենք նաև, որ մայիսի 25-ին Գեղարքունիքի մարզի Վերին Շորժա գյուղի հատվածում հակառակորդի կրակոցներից մահացու վիրավորում է ստացել հայ զինծառայող, կրտսեր սերժանտ Գևորգ Խուրշուդյանը։