ԵՐԵՎԱՆ, 27 մայիսի – Sputnik. Հայաստանը պետք է կայացնի իր մոբիլիզացիոն ռեսուրսը, որը չի ունեցել 20 տարի շարունակ։ Նման հայտարարություն այսօր լրագրողների հետ ճեպազրույցում արեց ԱԺ «Իմ քայլը» խմբակցության անդամ, Պաշտպանության ու անվտանգության հարցերի մշտական հանձնաժողովի նախագահ Անդրանիկ Քոչարյանը։
«Ժամանակն է, որպեսզի մենք ինքներս մտածենք մեր մոբիլիզացիոն ռեսուրսի կարգավորման մասին և բոլոր սցենարներն ունենանք մեր տեսադաշտում,– ասաց նա,– մենք ունենք սահմանային լարվածության աճ, իսկ հետագա լարվածությունը կանխելու համար մեր ոչ միայն ԶՈւ կառավարման մակարդակը պետք է ունենա թռիչքային զարգացում, այլև իրական մոբիլիզացիոն ռեսուրսի կայացման անհրաժեշտությունը»,– ասաց նա։
Անդրանիկ Քոչարյանը պարզաբանեց, որ մոբիլիզացիոն ռեսուրսի կարգավորումը պետք է իրականացվի եռամսյա, վեցամսյա հավաքների միջոցով` բանակային կառույցներում բանակային պատրաստություն անցնելու միջոցով։
Ինչպես արդեն հայտնել էինք, այսօր գիշեր ադրբեջանական կողմը Գեղարքունիքի սահմանային հատվածում 6 հայ զինծառայողի է գերեվարել։
Հիշեցնենք` ադրբեջանցի զինվորականները մայիսի 12-ից Հայաստանի Սյունիքի մարզում գտնվող Սև լճի տարածքում են և փորձում են ամրապնդվել այնտեղ։ Նմանատիպ իրավիճակ է նաև Գեղարքունիքի մարզի Կութ, Վերին Շորժա և Նորաբակ գյուղերի հատվածում։
Ռուսական կողմի միջնորդությամբ բանակցությունների մի քանի փուլ է կայացել։ Հակառակորդն առայժմ հեռանալու մտադրություն դեռ չունի։ Հայաստանը դիմել է ՀԱՊԿ-ին և ռազմական օգնություն խնդրել Ռուսաստանից։
Ռազմաքաղաքական ղեկավարությունը հայտարարում է, որ ցանկանում է խնդիրը լուծել խաղաղ ճանապարհով, բայց չի բացառում նաև ուժի կիրառման տարբերակը, եթե բանակցությունները արդյունք չտան։
Մայիսի 25-ին Գեղարքունիքի մարզի Վերին Շորժա գյուղի հատվածում հակառակորդի կողմից արձակված կրակոցներից մահացու վիրավորում է ստացել զինծառայող, կրտսեր սերժանտ Գևորգ Խուրշուդյանը:
