ԵՐԵՎԱՆ, 17 հունիսի – Sputnik. Ռուսաստանի նախագահ Վլադիմիր Պուտինն իր ամերիկացի գործընկեր Ջո Բայդենին բնութագրել է որպես շատ ուշադիր և պրոֆեսիոնալ մարդ և հավելել, որ մամուլի ներկայացրած պատկերն իրականության հետ ոչ մի կապ չունի: Այս մասին ՌԴ նախագահը հայտարարել է Պետական կառավարման բարձրագույն դպրոցի կադրային կառավարման ռեզերվի զարգացման ծրագրի IV հոսքի շրջանավարտների առջև ունեցած ելույթում։
«Բայդենը պրոֆեսիոնալ է, և պետք է նրա հետ ուշադիր աշխատել, որպեսզի ոչինչ բաց չթողնես։ Նա ինքը ոչինչ բաց չի թողնում, հավատացնում եմ»,-ընդգծել է Պուտինը։
Նախագահն ավելացրել է նաև, որ Ջո Բայդենն առույգ տեսք ունի և «լիովին թեմայի մեջ է»։
«Նա առույգ տեսք ունի, ես նրա հետ դեմառդեմ զրուցել եմ երկու ժամ շարունակ, գուցեև ավելի, նա լրիվ թեմայի մեջ է։ Ժամանակ առ ժամանակ (Բայդենը՝ խմբ․) նայում էր իր նոթատետրին, մենք բոլորս էլ այդպես ենք անում»,-ասել է Պուտինը` ավելացնելով, որ մամուլը՝ ռուսական և անգամ ամերիկյան մամուլը, չափից դուրս շատ է աղավաղում Բայդենի կերպարը։
Պուտինն ընդգծել է, որ Ամերիկայի նախագահի՝ զանգվածայի մեդիայի կողմից ստեղծված պատկերն «իրականության հետ որևէ ընդհանուր բան չունի»։
Պուտինի և Բայդենի առաջին հանդիպումը կայացել է հունիսի 16–ին Ժնևում, բանակցությունները տևել են 4,5 ժամ` ներառյալ ընդմիջումը: Արդյունքում Պուտինը հայտարարել է, որ Բայդենի հետ պայմանավորվել է միջգերատեսչական մակարդակով ռազմավարական կայունության վերաբերյալ խորհրդակցություններ սկսել:
Պուտինի համար լարված օր էր. Պեսկովը` Բայդենի հետ հանդիպման մասին
