ԵՐԵՎԱՆ, 20 հունիսի - Sputnik. Սիսիանում «Հայաստան» դաշինքի շտաբերում կատարվող խուզարկությունների հիմքը, ըստ դատարանի որոշման, քվեաթերթիկ տպելու սարքի որոնումն է։ Դաշինքի նախընտրական կենտրոնական շտաբի պաշտոնական ներկայացուցիչ Արամ Վարդևանյանը Facebook-ի իր էջում հայտարարություն է տարածել՝ «խուզարկության օպերացիան աննախադեպ խայտառակություն» անվանելով։
Նրա խոսքով՝ քվեաթերթիկ տպող սարքի որոնման աբսուրդն այն է, որ նման սարք գոյություն ունենալ չի կարող։ Վարդևանյանն ընդգծում է՝ քվեաթերթիկները տպագրվում են բացառապես հատուկ տպարաններում, և դրանցից որևէ մեկը չի կարող շտաբում տեղակայված լինել:
«Միաժամանակ տեղեկություն ունենք, որ խուզարկության որոշումը կայացվել է ոչ թե Սյունիքի մարզի ընդհանուր իրավասության դատարանի կողմից, այլ Երեւան քաղաքի ընդհանուր իրավասության դատարանի դատավոր Մնացական Մարտիրոսյանի կողմից: Նպատակը նշված գործողության հանդիսանում է «Հայաստան» դաշինքի համակիրների գործունեության պարալիզացումը հենց ընտրությունների օրը, ինչը աննախադեպ է և նախկինում երբևէ չհանդիպած խայտառակություն»,- նշում է Վարդևանյանը։
Նա հավելում է, որ շտաբի պատասխանատուներին «առանց որևէ պատճառի ընտրությունների օրը տեղափոխում են Սյունիքի մարզից Երևան, իբր բացատրություն վերցնելու նպատակով»:
«Հայաստան» դաշինքը դիմում է Կենտրոնական ընտրական հանձնաժողովին՝ կոչ անելով ձեռնարկել անհրաժեշտ բոլոր միջոցները դաշինքի բնականոն գործունեության և քվեարկության գործընթացը անհապաղ վերականգնելու նպատակով: Դաշինքը նաև դիմում է Մարդու իրավունքների պաշտպանին՝ հորդորելով ստեղծված իրավիճակը խիստ վերահսկողության տակ պահել։
Սպիտակում 10 հազար դրամ ընտրակաշառք առաջարկելու մեղադրանքով կին է ձերբակալվել. ՔԿ
Նշենք, որ այսօր առավոտյանը ժամը 08։00–ին Հայաստանում մեկնարկել են ԱԺ արտահերթ ընտրությունները 2008 ընտրատեղամասերում։ Տեղամասերից 479–ը տեղակայված են մայրաքաղաք Երևանում, 1 529–ը` մարզերում։
Ընտրողների ցուցակներում այս պահին ընդգրկված է 2 մլն 593 հազար 572 ընտրող: Բոլոր քաղաքական ուժերի ընտրական ցուցակներում միասին վերցրած ընդգրկված է 2510 թեկնածու: Ընտրություններին կհետևեն 8 միջագային և օտարերկրյա դիտորդական առաքելություն իրականացնող կազմակերպությունների 833 միջազգային դիտորդներ։
Արտահերթ ընտրություններին մասնակցում է 25 քաղաքական ուժ, որից 4-ը դաշինք են, 21-ը` կուսակցություն։
