ԵՐԵՎԱՆ, 29 հունիսի – Sputnik. Հայաստանի տարածքում Ադրբեջանի կողմից խոցված ռուսական Մի-24-ի գործով քննությունը շարունակվում է։ ՌԻԱ Նովոստիին այսօր տեղեկությունը հայտնել է Ադրբեջանի գլխավոր դատախազության մամուլի ծառայության ղեկավար Գյունայ Սալիմզադեն։
«Նախիջևանի հատվածում հայ–ադրբեջանական սահմանին 2020 թվականի նոյեմբերի 9-ին ՌԴ–ին պատկանող Մի-24 ռազմական ուղղաթիռի խոցման առնչությամբ հրատապ ստուգումներից հետո գլխավոր դատախազությունը քրեական գործ է հարուցել։ Համապատասխան փորձաքննություններ են տարվել, հավաքվել իրեղեն ապացույցներ, ինչպես նաև իրականացվել այլ անհրաժեշտ ընթացակարգային գործողություններ», – հայտարարել է մամուլի ծառայության ղեկավարը։
Սալիմզադեն նաև ընդգծել է, որ Ադրբեջանի գլխավոր դատախազությունը ռուսական ուղղաթիռի աղետի հետ կապված գործի առնչությամբ կապահովի օրինական վճռի կայացում։
«Ներկա պահին քննությունը շարունակվում է, փորձաքննության արդյունքների համապատասխան օրինական վճռի ընդունումը կապահովվի», – ընդգծել է նա։
Գյումրու ռուսական ռազմաբազայի շարասյանն ուղեկցող ուղղաթիռը խոցվել էր նոյեմբերի 9-ին ադրբեջանական ԶՈւ–ի կողմից։ Զոհվել էին անձնակազմի 2 անդամ` Յուրի Իշչուկն ու Ռոման Ֆեդինը, իսկ Վլադիսլավ Գրյազինը հիվանդանոց էր տեղափոխվել։ Այդ միջադեպից հետո Արցախում հրադադարի մասին համաձայնագիր էր ստորագրվել։ Դեպքի վայրում հուշարձան կտեղադրվի։
Ադրբեջանական կողմը խոստովանել է, որ պատահաբար է խոցել ռուսական ուղղաթիռն ու ներողություն է հայցել։
«Ամեն ինչ էլ պատահում է»․ Ադրբեջանի դեսպանն արդարանում է Մի-24-ի պատճառով
