Հուլիսի 1-ից ուժի մեջ կմտնի տրանսպորտային խախտումները տեսա-լուսանկարահանելու և բջջային հավելվածի միջոցով հաղորդում տալու որոշման կարգը։ Թե ինչպես բջջային հեռախոսով ճանապարհային երթևեկության կանոնների խախտում արձանագրել, տեղեկացնում է ՀՀ ոստիկանությունը։
Նշենք, որ համապատասխան որոշումն ընդունվել էր 2020 թվականի հունիսի 11-ին ՀՀ կառավարության նիստում:
Բջջային հավելվածի միջոցով հնարավոր կլինի արձանագրել առավել հաճախակի հանդիպող և սովորական քաղաքացու համար տեսանելի 12 տեսակի իրավախախտում՝ հանդիպակաց երթևեկության գոտի դուրս գալը, կանգառի կայանման կանոնները խախտելը, լուսացույցի ազդանշանին չենթարկվելը, ավտոմեքենայից աղբ նետելը և այլն:
Եթե քաղաքացին բջջային հավելվածի միջոցով իսկապես իրավախախտում է ֆիքսել, ապա հաղորդումը հավելվածից կուղարկվի Ճանապարհային ոստիկանության ներքին համակարգ, որից հետո խախտումը համապատասխան ժամկետում կուղարկվի վարորդին։ Իրավախախտման արձանագրման ողջ գործընթացին կարող է հետևել այն անձը, որը ֆիքսել է տվյալ իրավախախտումը։
