ԵՐԵՎԱՆ, 2 հուլիսի – Sputnik, Արմենուհի Մխոյան. Շիրակի մարզի Իսահակյան գյուղում սանիտարական խստացված կանխարգելիչ միջոցառումներ են: Գյուղի մուտքը ոստիկանների հսկողության տակ է։ Գյուղ մուտք ու ելք անողներին զգուշացվում է ՝ մսամթերք ու կաթնամթերք դուրս չբերել։ Տեղեկությունը հայտնում է Sputnik Արմենիայի Շիրակի թղթակիցը։
Ինչպես արդեն հայտնել էինք, 2 օր առաջ սիբիրյան խոցի կասկածանքով Գյումրու ինֆեկցիոն հիվանդանոց տեղափոխված 7 հիվանդներից 5-ի մոտ արդեն հաստատվել է հիվանդությունը:
Ի դեպ, անկած անասունին բնակիչները մորթել ու վաճառել են գյուղում` չկասկածելով, որ սիբիրյան խոց է, այդ իսկ պատճառով տուժածների մեջ եղել են ինչպես մորթը կատարած, այնպես էլ միսը գնած գյուղաբնակներ: Իսահակյանի գյուղի վարչական ղեկավար Արտավազդ Արսենյանը Sputnik Արմենիային տեղեկացրեց, որ գյուղացիները հետո ինքնակամ միսն հանձնել են պատասխանատուներին:
Այն գյուղից բավական հեռու խորը փոսում այրել են, տարածքը քլորապատել ու հողով ծածկել, բետոնալցում իրականացրել: Ըստ պատասխանատուների` այս ամենը չէր կատարվի, եթե առաջին անասունի անկումից հետո տեղյակ պահվեր գյուղի անասնաբույժին:
Երեկ գյուղի անասնաբույժ Ռուստամ Սիմոնյանը, նախնական տեղեկություններով, ինքնասպան է եղել: Նրան հայտնաբերել են իրենց գոմի մուտքի մոտ: «Ես առավոտ զանգեցի, Ռուստամը զանգին չպատասխանեց։ Բժիշկները, որ եկել էին, գնացել են, որ իրանց անասուններին էլ ստուգեն, տանը հարցրել են, կինն ասել է գնացել է գյուղապետարան, բայց չէր եկել: Նրանք մտել են գոմ, որ կենդանիներին տեսնեն, հենց մուտքի մոտ տեսել են, որ կախված է»,- Sputnik Արմենիային պատմեց Իսահակյանի վարչական ղեկավար Արտավազդ Արսենյանը:
Հայաստանում գրանցված սիբիրյան խոցը վարակի մաշկային ձևն է. Ավանեսյան
Շիրակի մարզի դատախազ Գուրգեն Գրիգորյանն էլ Sputnik Արմենիային տեղեկացրեց, որ հարուցվել է քրեական գործ ՀՀ ՔՕ 110 հոդվածի 1-ին մասի հատկանիշերով (Ինքնասպանության հասցնելը): Կատարվում է նախաքննություն, դեպքի հանգամանքները պարզելու նպատակով իրականացվում են անհետաձգելի քննչական, դատավարական գործողություններ:
Կան վարկածներ, որոնց կապակցությամբ քննություն է տարվում: Հավելենք, որ անասնաբուժը գրություն է թողել:
Հիշեցնենք` օրեր առաջ Գեղարքունիքի մարզի Վանևան և Տորֆավան համայնքների 3 բնակչի մոտ սիբիրյան խոց էր ախտորոշվել։ Նախնական կասկածներով` վարակը տարածվել է հիվանդ անասունի մսից։
