2018 թվականին և հաջորդած երեք տարիներին այդպես էլ կադրային լուրջ փոփոխություններ տեղի չունեցան, և հաշվի առնելով իշխանության կողմից «կադրային ջարդ» իրականացնելու հայտարարությունները` կարելի է ենթադրել, որ խոսքը քաղաքական հաշվեհարդարի մասին է։ Անդրադառնալով մասնավորապես Երևանի քաղաքապետ Հայկ Մարությանի հնարավոր պաշտոնաթողության հարցին` այս մասին ասաց Հանրային կառավարման հարցերի փորձագետ Հովհաննես Ավետիսյանը։
«Լավ կամ վատ աշխատելն առհասարակ չպետք է լինի ինչ–որ մեկի սուբյեկտիվ կարծիքը։ Լավ չաշխատելու կամ նման ձևակերպման համար պետական կառավարման համակարգում կան որոշակի գործընթացներ, որոնք սահմանված են օրենքով ու ընթացակարգերով` լինի դա հանրային կամ քաղաքացիական ծառայության մասին օրենքը, թե առանձին ոլորտի այս կամ այն կարգավորումը։ Օրենքով սահմանված է, թե կոնկրետ որ դեպքերում պաշտոնատար անձի նկատմամբ կիրառվի խրախուսում կամ պատժամիջոց` ընդհուպ մինչև աշխատանքից ազատում»,– նշեց հանրային կառավարման հարցերի փորձագետը։
Ավետիսյանի կարծիքով` վերջին երեք տարիների ընթացքում օրենքն ամբողջ իմաստով, որակով և ընկալումներով չի կիրառվել, ավելին` անիմաստ կադրերի համար համակարգում կիրառվել են խրախուսման միջոցներ պարգևավճարների տեսքով, հետևաբար ստացվում է, որ վերջին երեք տարիներին կադրային գործընթացը կրել է սուբյեկտիվ բնույթ։
«Հայկ Մարությանը նույն քաղաքական թիմի մեջ է, ՔՊ–ի անդամ է և նրա վրա ազդեցությունը քաղաքական է, իսկ օրենքի տառի իմաստով` Երևանը տեղական ինքնակառավարման մարմին է և իր ղեկավար կազմը ձևավորում է ինքնուրույն ընտրություններով, ուստի կողքից միջամտությունն ապօրինի է»,– ասաց հանրային կառավարման հարցերի փորձագետը։
Ավետիսյանի գնահատմամբ` կադրային քաղաքականությունը մարդկանց կարողությունների, խնդիրներ լուծելու ունակությունների վրա հիմնված գործընթաց է, այլ ոչ թե քաղաքական նպատակադրումների արգասիք։
Նշենք, որ ժամանակ առ ժամանակ ակտիվանում են Հայկ Մարությանի պաշտոնանկության մասին լուրերը. օրեր առաջ «Ազատություն» ռադիոկայանին տված հարցազրույցում վարչապետի պաշտոնակատարի գլխավոր խորհրդական (այժմ արդեն կառավարության աշխատակազմի ղեկավար) Արայիկ Հարությունյանը քննադատել էր Երևանի քաղաքապետ Հայկ Մարությանին` նշելով, որ նա, լինելով «Իմ քայլի» կողմից առաջադրված քաղաքապետ, նախընտրական փուլում ակներև և հրապարակային աջակցություն չի հայտնել ՔՊ-ին, իսկ այն քվեն, որով Մարությանը դարձել է Երևանի քաղաքապետ, մեծամասամբ այն ուժինն է, որը երկրորդ անգամ է ձևավորելու կառավարություն։
Հարությունյանը նաև նշել էր, որ կուսակցականների շրջանում Մարությանի նկատմամբ ձևավորվել է հստակ վերաբերմունք, և նրանք պետք է հասկանան ու որոշում կայացնեն` ինչ անեն այս իրավիճակում, որ քաղաքը և քաղաքային իշխանությունը չտուժեն։
Երևանի քաղաքապետների արտառոց ազատումները. կարևոր չէ` ոնց ես աշխատել, կարևորը` ՔՊ–ին գովես
