ԵՐԵՎԱՆ, 10 հուլիսի - Sputnik. Իրանում կորոնավիրուսի հետ կապված իրավիճակը վատանում է, չի բացառվում, որ հիվանդության հինգերորդ ալիք լինի։ ՌԻԱ Նովոստիի փոխանցմամբ՝ կորոնավիրուսի դեմ պայքարի կոմիտեի նիստում նման կարծիք է հայտնել Իրանի նախագահ Հասան Ռոհանին։
«Հարավային ու հարավարևելան շրջաններում կորոնավիրուսի «դելտա» մանրէահիմքի տարածում է նկատվել։ Իշխանությունը փորձել է կանխել տարածումը, սակայն այդ մանրէահիմքը ներթափանցել է այլ նահանգներ, ու վիճակը նախորդ շաբաթների համեմատությամբ նկատելիորեն վատացել է»,-ասել է Իրանի նախագահը:
Նրա խոսքով՝ չնայած օրական 500 հազար քաղաքացիների պատվաստելու հնարավորությանը, պետք է հետևել նաև վիրուսի տարածումը կանխելուն ուղղված հորդորներին:
«Հնարավոր է՝ հինգերորդ ալիքն արդեն սկսվել է», - ասել է նախագահը:
Կորոնավիրուսով վարակվելու թվերն աճում են. արտասահմանցիները կպատվաստվեն նոր կարգով
Ապրիլի սկզբին Իրանի իշխանությունը հայտնել էր COVID-19-ի չորրորդ ալիքի մասին։ Իրանում COVID-19 վարակի դեպքերի ընդհանուր թիվը հասել է 3,3 միլիոնի, ապաքինվել է ավելի քան 3 միլիոն մարդ:
