ԵՐԵՎԱՆ, 12 հուլիսի – Sputnik. Քրեական հեղինակություն Ռաշադ Իսմայիլովին (քրեական աշխարհում հայտնի է որպես Ռաշադ Գյանջինսկի) Մոսկվայում մեղադրանք են առաջադրել հանցավոր հիերարխիայում բարձրագույն դիրք գրավելու համար, հաղորդում է ՌԻԱ Նովոստին:
Հետաքննության տվյալներով՝ Իսմայիլովը 2013 թ․-ից սկսած յոթ տարի շարունակ «օրենքով գող» է եղել։
«Իսմայիլովի նկատմամբ քննվել է նաև Ռուսաստանի քրեական օրենսգրքի 210.1 հոդվածով («Հանցավոր հիերարխիայում բարձրագույն դիրք զբաղեցնելը») նախատեսված հանցագործության հատկանիշներով քրեական գործը, որի շրջանակներում հաստատվել է նրա մասնակցությունը 2009 թվականին կատարված սպանությանը»,-լրագրողներին ասել է ՔԿ Մոսկվայի գլխավոր քննչական վարչության ներկայացուցիչ Յուլյա Իվանովան:
Արդյունքում Իսմայիլովի գործողություններին լրացուցիչ որակավորում է տրվել ՌԴ քրեական օրենսգրքի 105-րդ հոդվածի 2-րդ մասով (երկու և ավելի անձանց սպանություն) և 222-րդ հոդվածի 1-ին մասով («Զենքի ապօրինի շրջանառություն») նախատեսված հանցագործությունների հատկանիշներով:
Հաստատվել է, որ 2009 թ․-ի մայիսի 13-ի երեկոյան Իսմայիլովը հանցակցի հետ միասին եկել է Իզմայլովսկի խճուղու սրճարաններից մեկի մոտ, որտեղ հրազենից կրակել է ավտոմեքենայի վրա: Արդյունքում երկու տղամարդ է սպանվել։ Քննության վարկածով՝ հանցագործության դրդապատճառը վրեժխնդրությունն է եղել՝ անձնական անբարյացակամ հարաբերությունների հողի վրա․ Իսմայիլովը կարծում էր, որ տուժողները մեղսակից են իր մտերիմ ծանոթի սպանությանը:
Չեխ իրավապահները ձերբակալել են «օրենքով գող» Վիտալի Ավդիյանին
Այժմ քննիչները պարզում են Իսմայիլովի մասնակցությունը Ռուսաստանի մայրաքաղաքի տարածքում կատարված այլ հանցագործություններին։
