ԵՐԵՎԱՆ, 12 հուլիսի – Sputnik. Վարչապետի պաշտոնակատար Նիկոլ Փաշինյանը համոզված է, որ ՀՀ քննչական կոմիտեի` աշխատանքից ազատված նախագահ Հայկ Գրիգորյանի մասնագիտական կարողությունները և հմտություններն անպայման կկիրառեն պետական կառավարման համակարգում։ Փաշինյանն այս մասին հայտնել է կառավարության այսօրվա արտահերթ նիստի ժամանակ, տեղեկանում ենք վարչապետի մամուլի ծառայությունից։
Հայտնել էինք, որ կառավարության այսօրվա արտահերթ նիստի ժամանակ ՔԿ նախագահ Հայկ Գրիգորյանն ազատվել է պաշտոնից։ Նրան փոխարինում է ԱԱԾ նախկին տնօրեն, ՔԿ տեղակալ Արգիշտի Քյարամյանը։
«Բարձր եմ գնահատում պարոն Գրիգորյանի աշխատանքն այդ կարգավիճակում, այդ պաշտոնում: Մենք առաջիկայում կքննարկենք պարոն Գրիգորյանի հետ մեր հետագա անելիքները»,–ասել է Փաշինյանը։
Նա հաջողություն է մաղթել նաև Արգիշտի Քյարամյանին նոր պաշտոնում` ասելով, որ ՔԿ–ն մեր ամենամեծ քննչական մարմինն է, որն իրականացնում է ՀՀ-ում նախաքննության առյուծի բաժինը:
Հայկ Գրիգորյանը չի «մարսելու» Ամուլսարը. «Փաստ»
«Եվ մենք պետք է միշտ, անընդհատ մտածենք կոմիտեի և ընդհանրապես մեր նախաքննության, իրավապահ մարմինների արդյունավետության բարձրացման ուղղությամբ»,–ասել է Փաշինյանը։
Հիշեցնենք, որ Գրիգորյանը 2018 թվականի հունիսի 10-ին կառավարության որոշմամբ նշանակվել էր ՀՀ քննչական կոմիտեի նախագահ։
Քննչական կոմիտեի ղեկավարը հրաժեշտ կտա՞ պաշտոնին. պատասխանում է Հայկ Գրիգորյանը
