ԵՐԵՎԱՆ, 26 հուլիսի – Sputnik. Արցախի Մարտակերտ քաղաքի շրջանային հիվանդանոցում կազմակերպված բժշկական ակցիայի շրջանակում մարդասիրական արձագանքման կենտրոնի սպաներն ու ռուսական խաղաղապահ զորախմբի հատուկ նշանակության բժշկական ջոկատի ռազմական բժիշկներն առաջին անգամ ծնունդ են ընդունել։
«Տղա է լույս աշխարհ եկել, մայրը հենց վերակենդանացման բաժանմունքում Հովհաննես անվանեց նրան։ Փոքրիկը ծնվել է 4 կգ 250 գ քաշով, հասակը՝ 49 սմ»,– պատմել է ռուսական խաղաղապահ զորակազմի հատուկ նշանակության բժշկական ջոկատի բժիշկ–անեսթեզիոլոգ Անատոլի Ախապկինը։
ՌԴ ՊՆ–ի հաղորդագրությունում նշվում է, որ հղի կինը որովայնի ցավերի պատճառով դիմել էր Մարտակերտի շրջանային հիվանդանոց: Հիվանդանոցի աշխատակազմը, իմանալով, որ հիվանդանոցում ու քաղաքում համապատասխան մասնագետ չկա, որոշել էր օգնության դիմել ռուս ռազմական բժիշկներին: Հատուկ նշանակության ջոկատի բժիշկները, ունենալով հսկայական փորձ ու մասնագիտական պատրաստվածություն, ցուցաբերել են որակյալ օգնություն, փրկել են կնոջը և երեխային:
«Շնորհակալություն ռուսական խաղաղապահ ուժերի մեր գործընկերներին։ Նրանց շնորհիվ մենք ամեն ինչ ժամանակին արեցինք»,-պատմել է Մարտակերտի շրջանային հիվանդանոցի մանկաբարձ-գինեկոլոգ Լուսինե Իսկանդարյանը։
Հատուկ նշանակության ջոկատի բժիշկները բուժօգնություն են ցուցաբերել նաև Մարտակերտի շրջանի հեռավոր բնակավայրերի 52 բնակչի:
Մարդասիրական արձագանքման կենտրոնի սպաներն էլ իրենց հերթին են ակցիա անցկացրել` պարենամթերք ու առաջին անհրաժեշտության իրեր փոխանցելով բազմազավակ ընտանիքներին, փախստականներին ու կարիքավորներին։
Հիշեցնենք` 2020թ.–ի սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում սկսեց արցախա–ադրբեջանական սահմանի ողջ երկայնքով։
2020թ.–ի նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն ընդունեցին ռազմական գործողությունների դադարեցման վերաբերյալ։
Եռակողմ հայտարարության համաձայն` Լեռնային Ղարաբաղի շփման գծի և Լաչինի միջանցքի երկայնքով տեղակայվեց Ռուսաստանի Դաշնության խաղաղապահ զորակազմը ՝ 1960 զինծառայողներով, հրաձգային զենքով, 90 զրահամեքենաներով, 380 միավոր ավտոմոբիլային և հատուկ տեխնիկայով:
Ռուսաստանի Դաշնության խաղաղապահ զորակազմը տեղակայվել է 5 տարի ժամկետով, որից հետո այդ ժամանակահատվածը մեխանիկորեն կերկարաձգվի ևս 5 տարով, եթե կողմերից որևէ մեկը ժամկետի ավարտից 6 ամիս առաջ չհայտարարի տվյալ դրույթի կիրառումը դադարեցնելու մտադրության մասին:
