ԵՐԵՎԱՆ, 27 հուլիսի – Sputnik. Ռուբեն Յոլյանի անվան արյունաբանական կենտրոնում առաջին անգամ հայ մասնագետները կատարել են ոսկրածուծի ալոգեն փոխպատվաստում։ Այս մասին Facebook-ի իր էջում գրել է Երևանի պետական բժշկական համալսարանի ռեկտոր Արմեն Մուրադյանը։
Նա նշել է, որ փոխպատվաստումն արվել է երկու հոգու մոտ, երկու հիվանդներն էլ Աֆրիկայից են։
Կենտրոնի ներկայացուցիչները լրագրողների հետ զրույցում ասել են, որ առաջին փոխպատվաստումն արվել է 5 տարեկան երեխային հուլիսի 7-ին, երկրորդը՝ ութ տարեկանին, հուլիսի 13-ին։ Երկու երեխայի մոտ էլ բարդացումներ չեն առաջացել։
Նշվել է, որ հիվանդությունը տարածված է Աֆրիկայում, Հայաստանում այն հազվադեպ է հանդիպում։ Սա դեռ ծրագրի սկիզբն է։
«Մի վիրաբույժը հայ էր, մյուսը` ռուս». ինչպես են Մարտակերտում բժիշկները կյանքեր փրկում
Առաջին անգամ ցողունային բջիջների աուտոտրանսպլանտացիա նույն կենտրոնում կատարել են 2-ամյա երեխային դեռ 2018 թվականին։ Այն ժամանակ բժշկական կենտրոնում խոստացան, որ երկու տարի անց, երբ հայ բժիշկները բավականաչափ փորձ կունենան, երկրում կսկսեն Գերմանիայի հետ համատեղ ներդնել ալոգենային փոխպատվաստման ծրագիր:
Առողջապահության համաշխարհային կազմակերպության տվյալներով՝ ցողունային բջիջների փոխպատվաստման առաջին փորձը արվել է միջուկային ճառագայթում ստացած մարդկանց վրա:
Այսօր ամբողջ աշխարհում ամեն տարի իրականացվում է ավելի քան 50 000 փոխպատվաստում ։
