«ԼՂ հարցով բանակցային պրոցեսը վերականգնելու հնարավորություն ունենք». Սերժ Սարգսյան

© Sputnik / Asatur YesayantsՍերժ Սարգսյան
Սերժ Սարգսյան - Sputnik Արմենիա, 1920, 31.01.2022
Բաժանորդագրվեք
НовостиTelegram
ՀՀ երրորդ նախագահն ասաց` ինչպես կարող ենք ԼՂ հարցը կրկին դնել բանակցային սեղանին։
ԵՐԵՎԱՆ, 31 հունվարի – Sputnik. ՀՀ երրորդ նախագահ Սերժ Սարգսյանը կարծում է, որ ԼՂ հարցով բանակցային պրոցեսը վերականգնելու հնարավորություն ունենք։ Սարգսյանն այս մասին ասաց այսօր հրապարակված իր հարցազրուցի ժամանակ։
ՀՀ երրորդ նախագահը վստահ է` Ղարաբաղյան հակամարտությունը հանգուցալուծված չէ։

«Մեր հասարակության այն հատվածը, որը համարում է, որ Արցախը հայկական է, այն մասը, որը համարում է, որ մենք ի վիճակի ենք ուղղել մեր մեջքը, կոչ եմ անում բոլոր այդ մարդկանց, որ համախմբվենք ու սրանից (իշխանությունից,–խմբ.) պահանջենք, որ դադարեցնեն այդ քաղաքական մուրացկանությունը: Խաղաղություն աղերսելը երբեք չի բերել խաղաղության»,–ասում է նա։

Սարգսյանի խոսքով` ինքը չի ասում, որ պետք չէ ձգտել խաղաղության և պետք չէ ռևանշի տարր փնտրել։ Նա մանրամասնեց, որ իր ասածը հետևյալն է` չնայած ջախջախված ենք, չնայած կապիտուլացված ենք` հնարավորություն ունենք բանակցային պրոցեսը վերականգնելու և պետք է պնդենք, որպեսզի ներկայիս իշխանությունը գնա այդ ճանապարհով:
Նա հավելեց, որ պետք է շատ կտրուկ պահանջներ ներկայացնենք և ոչ միայն խոսքով:
Սարգսյանը կարծում է, որ եթե այդ պահանջները նորմալ ներկայացնենք, ապա որոշ ժամանակ հետո կարող ենք խոսել, որ ինչ-որ չափով բանակցային պրոցեսը վերականգնվում է:
ԼՂ բանակցությունների բոլոր փաստաթղթերն ունեմ. Սարգսյանն ասաց` ինչու չի հրապարակում դրանք
Նա հայտարարեց նաև, որ 2018 թվականից հետո (հատկապես կործանարար պատերազմից հետո) մեզ փորձում էին մեղադրել ռազմատենչության մեջ, սակայն ՀՀ–ն երբեք ռազմատենչ չի եղել։
Նա իր խոսքն ամփոփեց` ասելով, որ մենք երբեք ռևանշիստ չենք եղել, բայց երբեք էլ մեր ունեցածն ուրիշին հանձնելու, տալու կողմնակիցը չենք եղել, որովհետև դա մեր անձնական խնդիրը չէ, դա մեր ժողովրդի խնդիրն է:
Հիշեցնենք` 2020թ.–ի սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում սկսեց արցախա–ադրբեջանական սահմանի ողջ երկայնքով։
2020թ.–ի նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն ընդունեցին ռազմական գործողությունների դադարեցման վերաբերյալ։
Եռակողմ հայտարարության համաձայն` Լեռնային Ղարաբաղի շփման գծի և Լաչինի միջանցքի երկայնքով տեղակայվեց Ռուսաստանի Դաշնության խաղաղապահ զորակազմը՝ 1960 զինծառայողներով, հրաձգային զենքով, 90 զրահամեքենաներով, 380 միավոր ավտոմոբիլային և հատուկ տեխնիկայով:
Ռուսաստանի Դաշնության խաղաղապահ զորակազմը տեղակայվել է 5 տարի ժամկետով, որից հետո այդ ժամանակահատվածը մեխանիկորեն կերկարաձգվի ևս 5 տարով, եթե կողմերից որևէ մեկը ժամկետի ավարտից 6 ամիս առաջ չհայտարարի տվյալ դրույթի կիրառումը դադարեցնելու մտադրության մասին:
Լրահոս
0