Фон для радио  - Sputnik Արմենիա, 1920
ՌԱԴԻՈ

Կրթության հավակնոտ ծրագիրն ու իրականությունը. ինչի՞ց է պետք սկսել նշաձողին հասնելու համար

Խաչատրյան. Եթե կրթության որակը չփոխվի, միջազգային չափանիշներով չորս առաջատար ԲՈՒՀ չենք ունենա
Բաժանորդագրվեք
Yandex newsTelegram
Կրթական հարցերի փորձագետ Սերոբ Խաչատրյանը Sputnik Արմենիայի եթերում անդրադարձել է ՀՀ կրթության՝ մինչև 2030 թվականն ընդգրկող զարգացման պետական ծրագրի հավակնոտ դրույթներին:
Որպեսզի մեր ուսումնական բոլոր հաստատություններն ունենան եվրոպական չափանիշներին համապատասխան որակի հավաստագրեր, անհրաժեշտ է կատարել բավականին լուրջ և արմատական փոփոխություններ։ Նման արդյունքի հասնելու համար պետք է սկսել այսօրվանից, թեև «եվրոպական չափանիշների հավաստագրեր» հասկացությունը մի փոքր լղոզված է։ Sputnik Արմենիայի հետ զրույցում այս մասին ասաց կրթական հարցերի փորձագետ Սերոբ Խաչատրյանը։
Անդրադառնալով այն կետին, ըստ որի` մինչև 2030 թվականը հայաստանյան առնվազն չորս բուհ ընդգրկված կլինեն միջազգային վարկանիշային աղյուսակների լավագույն 500-ի մեջ, Խաչատրյանն ընդգծեց, որ դա բավականին բարդ իրագործելի նպատակ է, մենք բավականին հեռու ենք նման արդյունքից։

«Այդ նպատակին հասնելու համար անհրաժեշտ են հսկայական ներդրումներ։ Եթե բուհերի դասախոսների աշխատավարձերը կտրուկ չբարձրանան, կրթության որակը չփոխվի, չենք ունենա չորս առաջատար հաստատություն։ Բացի դրանից, պարզ չէ, թե ինչ դասակարգմամբ պետք է ընտրվեն առաջատար բուհերը և որ համակարգով են դրանք մտնելու լավագույն 500–ի մեջ։ Համակարգերից մեկով Երևանի պետական համալսարանը 800–ից 1000 բուհերի ցանկում արդեն իսկ ընդգրկված է։ Հարևան Վրաստանն, օրինակ, կարողացել է մի քանի ուսումնական հաստատություններ առաջ մղել բավականին մեծ ներդրումների շնորհիվ»,– ասաց կրթական հարցերի փորձագետը։

Նրա կարծիքով` մեր բուհերի միջազգային վարկանիշի բարձրացմանը կարող է նպաստել նաև առանձին մասնագիտությունների գծով ժամանակին ստեղծված դպրոցների վերականգնումը, որովհետև գիտությամբ զբաղվելն, ըստ փորձագետի, զուտ անհատական գործունեություն չէ, ուստի անհրաժեշտ է խթանել գիտական համայնքների վերականգնման գործընթացը, որոնք մասնագիտացված դպրոցներն առաջ տանելով` բուհերում կստեղծեն համապատասխան գիտահետազոտական միջավայր։
1000-ից պակաս բնակչով համայնքի ղեկավարը կարող է չունենալ բարձրագույն կրթություն. նախագիծ
Խաչատրյանի կարծիքով` մինչև 2030 թվականն ընդդգրկող զարգացման պետական ծրագրի թերևս ամենաանհասկանալի դրույթն այն է, որ ուսումնական հաստատություններն ավարտելուց հետո ըստ մասնագիտության աշխատանքի կանցնի շրջանավարտների 90%-ը։

«Գուցե արհեստագործական և միջին մասնագիտական կրթության դեպքում դա որոշ չափով հնարավոր կլինի, բայց բարձրագույն կրթության պարագայում նման ուղենիշի հասնելն ընդհանրապես իրականության հետ կապ չունի, որովհետև այսօր շրջանավարտների մեծամասնությունն իր մասնագիտությամբ չի աշխատում, և ես չեմ կարծում, որ առաջիկա ութ տարում մենք այդքան կբեկենք իրավիճակը։ Շուկայական տնտեսության պայմաններում նման արդյունքի հասնելն անհավանական է, առավել ևս, որ այսօր բուհերի ու աշխատաշուկայի միջև անմիջական կապ չկա»,– ասաց կրթական հարցերի փորձագետը։

Նրա խոսքով` եթե հասնենք նրան, որ գոնե շրջանավարտների կեսն աշխատի իր մասնագիտությամբ, ապա դա կհամարվի զգալի ձեռքբերում։
Նշենք, որ ՀՀ ԿԳՄՍ նախարարությունը հանրային քննարկման է ներկայացրել «Հայաստանի Հանրապետության կրթության՝ մինչև 2030 թվականը զարգացման պետական ծրագիրը»:
Մայր բուհի ՔՊ-ականացում է գնում. Սողոմոնյանը` ԵՊՀ-ում տեղի ունեցող զարգացումների մասին
Նախագծի ընդունման անհրաժեշտությունը պայմանավորված է «Կրթության մասին» ՀՀ օրենքի պահանջով, համաձայն որի` կրթության բնագավառում պետական քաղաքականության կազմակերպական հիմքը կրթության զարգացման պետական ծրագիրն է:
Նախագծում սահմանվել են ՀՀ կրթության ոլորտի զարգացման գերակայությունները, ռազմավարության սկզբունքներն ու ծրագրային ուղղությունները:
Լրահոս
0