Կանանց ու երեխաներին Խրամորթից տեղափոխել են այլ տարածք. անվտանգային աշխատանքներ են տարվում

Գյուղ Արցախի Ասկերանի շրջանում - Sputnik Արմենիա, 1920, 15.03.2022
Բաժանորդագրվեք
Yandex newsTelegram
Բացի Խրամորթից, այլ համայնքների բնակիչների անվտանգության հետ կապված խնդիր չկա։
ԵՐԵՎԱՆ, 15 մարտի – Sputnik. Վերջին օրերին Ադրբեջանի զինված ուժերի կողմից իրականացվող սադրանքների պատճառով Ասկերանի շրջանի Խրամորթ համայնքից ժամանակավորապես այլ բնակավայրեր են տեղափոխվել գյուղի կանայք և երեխաները։ Ասկերանի շրջանի վարչակազմի այս հայտարարությունը հրապարակել է Արցախի տեղեկատվական շտաբը։

«Տեղեկացնում ենք, որ նրանք դեռևս չեն վերադարձել հայրենի գյուղ, քանի որ իրականացվում են անվտանգային լրացուցիչ աշխատանքներ։ Այլ բնակավայրերի բնակիչների անվտանգության մասով որևէ նման խնդիր առկա չէ, և բնակչության կողմից լրացուցիչ նախազգուշական միջոցներ ձեռնարկելու անհրաժեշտություն չկա»,–ասված է հայտարարության մեջ։

Միաժամանակ նշվում է, որ Արցախի պաշտպանության բանակը և մնացած լիազոր մարմինները հետևում են իրավիճակին և, ըստ անհրաժեշտության, կձեռնարկեն անվտանգության համապատասխան միջոցառումներ:
Հիշեցնենք` մարտի 9-ին և 10-ին Ադրբեջանի զինված ուժերը մեծ տրամաչափի հրաձգային զինատեսակներից թիրախավորել էին Մարտունու շրջանի Խնուշինակ և Կարմիր շուկա, Ասկերանի շրջանի Խրամորթ գյուղերի խաղաղ բնակչությանը, ինչի հետևանքով քաղաքացիական բնակչության շրջանում կա մեկ վիրավոր։
Իրենց տան բակում գյուղատնտեսական աշխատանքներ կատարելու ժամանակ հակառակորդի արձակած ականանետի կրակոցից մեջքի շրջանում բեկորային վիրավորում է ստացել Խրամորթի բնակիչ, 1971թ. ծնված Սուրեն Բաղրյանը։
Մարտի 11–ին Ադրբեջանի զինուժը ականանետ է կիրառել Խնապատ գյուղի ուղղությամբ, իսկ Թաղավարդում բարձրախոսով գյուղը լքելու կոչեր են հնչեցրել:
Նշենք, որ Խրամորթում 112 ընտանիք է ապրում, այդ թվում՝ Արցախի այլ վայրերից տեղահանված։
Լրահոս
0