Ալեն Սիմոնյանը Ալմաթիում հույս է հայտնել, որ Ղազախստանը կազդի Ադրբեջանի վրա
13:27 28.03.2022 (Թարմացված է: 13:32 28.03.2022)
Ալեն Սիմոնյանը հանդիպել է Ղազախստանի Սենատի նախագահ Մաուլեն Աշիմբաևի հետ
© Photo : official site of the Parliament of RA
Բաժանորդագրվել
Հանդիպմանն անդրադարձ է եղել նաև Ղազախստանում բնակվող 15 հազարից ավելի հայերի խնդիրներին:
ԵՐԵՎԱՆ, 28 մարտի - Sputnik. ՀՀ ԱԺ նախագահ Ալեն Սիմոնյանի գլխավորած պատվիրակությունը մարտի 28-ից երկօրյա այցով Ղազախստանի Ալմաթի քաղաքում է՝ մասնակցելու ԱՊՀ միջխորհրդարանական վեհաժողովի 30-ամյակին նվիրված նիստին: Այցի շրջանակներում ՀՀ ԱԺ նախագահը հանդիպել է Ղազախստանի Սենատի նախագահ Մաուլեն Աշիմբաևի հետ:
Տեղեկությունը հայտնում են ԱԺ հասարակայնության հետ կապերի և հաղորդակցության վարչությունից։
Ալեն Սիմոնյանը հանդիպել է Ղազախստանի Սենատի նախագահ Մաուլեն Աշիմբաևի հետ
© Photo : official site of the Parliament of RA
ՀՀ ԱԺ նախագահը շնորհակալություն է հայտնել ղազախ գործընկերոջը հյուրընկալության համար և շնորհավորել երկու երկրների միջև դիվանագիտական հարաբերությունների հաստատման 30-ամյակի առթիվ:
Ղազախստանի Սենատի նախագահը երախտագիտությամբ կարևորել է Հայաստանի՝ որպես ՀԱՊԿ-ում նախագահող պետության դերը՝ հունվարին Ղազախստանում տեղի ունեցած ռազմական բախումներին օպերատիվ արձագանքելու և դաշնակիցների հետ համատեղ աջակցություն ցուցաբերելու գործում:
Ալեն Սիմոնյանը հանդիպել է Ղազախստանի Սենատի նախագահ Մաուլեն Աշիմբաևի հետ
© Photo : official site of the Parliament of RA
Հանդիպմանը քննարկվել են ադրբեջանական զինված ուժերի սադրիչ գործողություններն Արցախում և Հայաստանի ինքնիշխան տարածք ներխուժելու փաստերը: Ալեն Սիմոնյանն ընդգծել է, որ հերթական անգամ Ադրբեջանը խախտել է 2020թ. նոյեմբերի 9-ի եռակողմ հայտարարությունը, ինչի հետևանքով կան զոհեր և վիրավորներ: Ալեն Սիմոնյանը տարածաշրջանի իրավիճակը բնութագրել է որպես խոր հումանիտար ճգնաժամ՝ հույս հայտնելով, որ Ղազախստանը՝ որպես դաշնակից, կազդի Ադրբեջանի վրա:
Ալեն Սիմոնյանը հանդիպել է Ղազախստանի Սենատի նախագահ Մաուլեն Աշիմբաևի հետ
© Photo : official site of the Parliament of RA
Հանդիպմանն անդրադարձ է եղել Ղազախստանում բնակվող 15 հազարից ավելի հայերի խնդիրներին: Ղազախստանի Սենատի նախագահը հավաստիացրել է, որ Ղազախստանում ապրող հայերն ամբողջությամբ ներգրավված են սոցիալ-մշակութային, տնտեսական և կրթական ասպարեզներում և օրինակելի համայնք են համարվում:
Հանդիպման ավարտին ՀՀ ԱԺ նախագահը ղազախ գործընկերոջը հրավիրել է պաշտոնական այց կատարել Հայաստան. հրավերը սիրով ընդունվել է:
