Այդ մարդիկ սպանվեցին միայն այն պատճառով, որ հայ էին. Մարաղայի ջարդերի 30–րդ տարելիցն է

© Photo : press-office of the MFA of ArtsakhԱրցախի ԱԳՆ
Արցախի ԱԳՆ - Sputnik Արմենիա, 1920, 10.04.2022
Արցախի ԱԳՆ
Բաժանորդագրվեք
НовостиTelegram
Մարաղայի կոտորածի արդյունքում շուրջ 50 մարդ ենթարկվել է կտտանքների և գազանաբար սպանվել, մի քանի տասնյակը՝ գլխավորապես կանայք և երեխաներ, գերեվարվել են, նրանցից 19-ի ճակատագիրն առ այսօր անհայտ է։
ԵՐԵՎԱՆ, 10 ապրիլի - Sputnik. Մարաղայի վրա Ադրբեջանի զինված ուժերի հարձակումը պայմանավորված չէր ռազմական անհրաժեշտությամբ․ նպատակը տարածքի գրավումն ու այնտեղ ապրող մարդկանց ոչնչացումն էր։ Արցախի Հանրապետության ԱԳՆ-ն այսպես է որակել Մարաղայի խաղաղ բնակչության նկատմամբ ադրբեջանական բանակի կողմից իրականացված գործողությունները։
Այսօր Արցախի Հանրապետության Մարտակերտի շրջանի Մարաղա ավանի խաղաղ բնակչության նկատմամբ ադրբեջանական բանակի կողմից 1991 թ․ ապրիլի 10-ին կազմակերպված դաժան հաշվեհարդարի 30-րդ տարելիցն է։ Կոտորածի արդյունքում շուրջ 50 մարդ, այդ թվում՝ 30 կին, ենթարկվել է կտտանքների և գազանաբար սպանվել, մի քանի տասնյակը՝ գլխավորապես կանայք և երեխաներ, գերեվարվել են, նրանցից 19-ի ճակատագիրն առ այսօր անհայտ է։
«Մարաղայի տասնյակ բնակիչներ սպանվեցին միայն այն պատճառով, որ հայ էին։ Մարաղայի ջարդը, որը ծրագրվել էր Ադրբեջանի իշխանությունների կողմից նաև որպես ահաբեկման ակտ, ի ցույց դրեց Բաքվի ցեղասպան ծրագրերն Արցախի ամբողջ բնակչության նկատմամբ»,–ասված է այսօր տարածած հայտարարության մեջ։
Ընդգծվում է, որ այն փաստը, որ ադրբեջանական զինված ուժերի՝ Մարաղայում պատերազմական հանցագործություններ կատարած ստորաբաժանումների հրամանատար Շահին Տագիևն արժանացել է Ադրբեջանի ազգային հերոսի կոչման, ևս մեկ անգամ փաստում է, որ խաղաղ բնակիչների զանգվածային սպանությունը ադրբեջանական զորքի առջև դրված գլխավոր խնդիրներից էր։ Ադրբեջանական իշխանությունների այդ քայլը վերահաստատեց, որ նրանք են կրում Մարաղայում իրականացված միջազգային հակաիրավական գործողությունների ողջ պատասխանատվությունը։
«Մարաղայի խաղաղ բնակիչների կոտորածն ադրբեջանական իշխանությունների կողմից ավելի քան 30 տարի կանոնավոր կերպով վարվող ցեղասպան քաղաքականության մասն է՝ սկսած Սումգայիթի դաժան ջարդերից մինչև 2020թ․44-օրյա զինված ագրեսիայի ընթացքում իրագործված պատերազմական հանցագործություններ»,–ասված է հաղորդագրության մեջ։

Նշվում է, որ միայն ուժեղ և բարգավաճող, իր պետականությունը զարգացնող, միջազգային իրավական սուբյեկտայնություն ունեցող և ողջ հայությանն իր շուրջ համախմբող Արցախը կարող է լինել Մարաղայի ողբերգության չկրկնվելու լավագույն երաշխիքը։
Մինսկի խումբը կազմալուծվում է, ի՞նչ կանեն Հայաստանն ու Ադրբեջանը. պատասխանում է քաղաքագետը
Լրահոս
0