«Նիկոլ Փաշինյանը կրկին ստում է». Սերժ Սարգսյանը պատասխանել է վարչապետին

© Sputnik / Asatur YesayantsՍերժ Սարգսյան
Սերժ Սարգսյան - Sputnik Արմենիա, 1920, 13.04.2022
Սերժ Սարգսյան
Բաժանորդագրվեք
Yandex newsTelegram
ՀՀ երրորդ նախագահը կարծում է, որ Նիկոլ Փաշինյանը կա՛մ մինչև հիմա չի հասկացել փուլային և փաթեթային տարբերակների տարբերությունը, կա՛մ գործի է դրել մանիպուլյացիան։
ԵՐԵՎԱՆ, 13 ապրիլի – Sputnik. ՀՀ երրորդ նախագահ Սերժ Սարգսյանն արձագանքել է վարչապետ Նիկոլ Փաշինյանի` ղարաբաղյան հակամարտության բանակցային գործընթացի վերաբերյալ ելույթին և գրառում արել ֆեյսբուքյան իր էջում։

«Վարչապետի աթոռը զբաղեցնող անձը ԱԺ-ի այսօրվա ելույթում հերթական անգամ ի ցույց դրեց ստախոսի և մանիպուլյատորի իր ողջ էությունը: Նա կրկին ստում է և փորձում մոլորեցնել հանրությանը, այդ թվում՝ ԼՂ հիմնախնդրի բանակցային գործընթացի մասին խոսելիս: Իմ պաշտոնավարման ամբողջ ժամանակաշրջանում ես երբեք չեմ բանակցել Արցախի հիմնախնդիրը փուլային տարբերակով լուծելու շուրջ: Վարչապետի աթոռը զբաղեցնող անձը կա՛մ մինչև հիմա չի հասկացել փուլային և փաթեթային տարբերակների տարբերությունը, կա՛մ գործի է դրել իր հիմնական զենքը՝ մանիպուլյացիան»,- գրել է նա:

Սարգսյանը նշել է, որ փուլայինի և փաթեթայինի տարբերության մասին մի քանի անգամ հրապարակային խոսել է, նաև հանգամանորեն բացատրել, որ փաթեթային տարբերակը չի կարող կյանքի կոչվել մեկ օրում կամ մեկ ժամում, այլ միանշանակ պետք է լուծվի փուլերով:
«Թող վերընթերցի տարբեր ժամանակահատվածներում իմ տված հարցազրույցները, և որքան էլ իր համար դժվար լինի, հասկանա այդ երկու տարբերակների տարբերությունը և առանձնահատկությունները: Ի դեպ, վերոհիշյալ թեմայով ասածներս հաստատել են նաև ԵԱՀԿ Մինսկի խմբի համանախագահները: Էլ չեմ խոսում իր կողմից «կառուցողական» բնորոշված Ալիևի խոստովանությունների մասին»,- եզրափակել է Սարգսյանը:
Հիշեցնենք` Փաշինյանն այսօր ԱԺ-ում իր ելույթին հաջորդած հարցուպատասխանի ընթացքում ասաց, որ իր կարծիքով՝ այն ուժերը, որոնք 1998 թվականին Լևոն Տեր-Պետրոսյանին իշխանությունից հեռացրին Ղարաբաղի հարցը փուլային տարբերակով լուծելու մտադրության համար, 20 տարի անց հանգեցին նույն կետին՝ սեղանին թողնելով փուլային կամ հիպերփուլային լուծման տարբերակը։
Ինձ պետք է մեղադրել ոչ թե հողեր հանձնելու, այլ չհանձնելու մեջ. Փաշինյան
Լրահոս
0