ՌԴ-Արևմուտք հարաբերություններում տեղի ունեցողը փորձադաշտ է Չինաստանի համար. քաղաքագետ

Չինաստանը հասկանում է, որ ՌԴ–ի դեմ կիրառվող զինանոցը կարող է կիրառվել նաև իր դեմ․ Բենիամին Պողոսյան
Բաժանորդագրվեք
Yandex newsTelegram
Քաղաքական եւ տնտեսական ռազմավարական հետազոտությունների կենտրոնի տնօրեն Բենիամին Պողոսյանը Sputnik Արմենիայի եթերում անդրադարձել է ուկրաինական ճգնաժամի պայմաններում ՌԴ-ի և Արևմուտքի միջև ընթացող հակամարտությանն ու Չինաստանի մոտեցումներին։
Դժվար է ասել, թե ուկրաինական ճգնաժամն ինչով կավարտվի, բուն ռազմական գործողությունները դժվար թե տարիներ տևեն, բայց հնարավոր է, որ կողմերը հայտնվեն ցածր ինտենսիվության հակամարտության պայմաններում։ Կլինի 2015 թվականի իրավիճակը, սակայն այս դեպքում ռուսական կողմը կվերահսկի շատ ավելի մեծ տարածքներ, Sputnik Արմանիայի եթերում ասաց քաղաքագետ Բենիամին Պողոսյանը։
Ըստ նրա` ստեղծված իրավիճակն անշուշտ մեծացնելու է ԱՄՆ-ի ուշադրությունը տարածաշրջանի նկատմամբ, սակայն մյուս կողմից էլ պետք է հաշվի առնել, թե ինչպիսի ներքաղաքական իրավիճակ կստեղծվի բուն ԱՄՆ-ում համապետական ընտրություններից առաջ, որովհետև շատ բան կախված կլինի դրանց արդյունքներից։
«Հրապարակված ազգային պաշտպանական ռազմավարության մեջ հստակ նշված է, որ ԱՄՆ-ն ունի երկու հիմնական մրցակից` Ռուսաստան և Չինաստան, ընդ որում, եթե առաջինը կարճաժամկետ սպառնալիք է, ապա երկրորդը` երկարաժամկետ, որովհետև Չինաստանը փորձում է Միացյալ Նահանգների հետ մրցել գրեթե բոլոր ոլորտներում` սկսած ռազմականից, վերջացրած տնտեսականով։ Հիշյալ ռազմավարության մեջ նշված է, որ եթե ՌԴ-ի հիմնական կռվանը ռազմական ներուժն է, ապա Չինաստանի հիմնական ներուժը տնտեսական զարգացումն է, սակայն դա էլ ժամանակի հետ փոխակերպվում է ռազմական ներուժի»,- ասաց քաղաքագետը։

Պողոսյանի դիտարկմամբ` Չինաստանն ուշադրությամբ հետևում է, թե ճնշման ինչպիսի լծակներ են օգտագործվում Ռուսաստանի դեմ, և ինչպես է կոլեկտիվ Արևմուտքը փորձում տնտեսապես ճնշել Ռուսաստանին կամ պատժամիջոցներով ստիպել հրաժարվել աշխարհաքաղաքական որոշ ձգտումներից ու գնալ լուրջ զիջումների։

Քաղաքագետի կարծիքով` Չինաստանը հասկանում է, որ նույն զինանոցը փորձելու են օգտագործել նաև իր դեմ, հետևաբար այն, ինչ կատարվում է Ռուսաստան-Արևմուտք հարաբերություններում, կարելի է ասել՝ իդեալական փորձադաշտ է Չինաստանի համար, որովհետև Պեկինը մեծ ուշադրությամբ հետևելու է Արևմուտքի քայլերին և Ռուսաստանի պատասխան քայլերին` հասկանալու, թե որ դեպքերում են պատասխան քայլերն ավելի ճիշտ։
Նշենք, որ Ռուսաստանի և Չինաստանի արտգործնախարարներ Սերգեյ Լավրովն ու Վան Ին Թունիսում անցկացված երկկողմ բանակցությունների ժամանակ կարծիքներ են փոխանակել նաև Ուկրաինայի շուրջ ստեղծված իրավիճակի վերաբերյալ։
Ինչպես հայտնում է ՌԴ ԱԳՆ մամուլի ծառայությունը` կողմերը նշել են Ռուսաստանի նկատմամբ ԱՄՆ-ի և նրա կամակատարների սահմանած միակողմանի անօրինական պատժամիջոցների անարդյունավետ բնույթը։
Երկու երկրների արտաքին գերատեսչությունների ղեկավարները փաստել են, որ միջազգային բարդ իրավիճակի պայմաններում Ռուսաստանն ու Չինաստանը շարունակում են ուժեղացնել ռազմավարական գործընկերությունը` համաշխարհային ասպարեզում հանդես գալով միասնական դիրքորոշմամբ։
Լրահոս
0