Ուշադիր նայեք մեր տղաների աչքերի մեջ. զոհվածների հարազատները կառավարության մոտ են գնում

© Sputnik / Aram NersesyanԱրցախյան պատերազմում զոհված զինծառայողների ծնողները, արխիվային լուսանկար
Արցախյան պատերազմում զոհված զինծառայողների ծնողները, արխիվային լուսանկար - Sputnik Արմենիա, 1920, 30.04.2022
Արցախյան պատերազմում զոհված զինծառայողների ծնողները, արխիվային լուսանկար
Բաժանորդագրվեք
Yandex newsTelegram
Զոհվածների հարազատները պահանջում են ձերբակալել Նիկոլ Փաշինյանին։
ԵՐԵՎԱՆ, 30 ապրիլի – Sputnik. 44-օրյա պատերազմում զոհվածների հարազատներն Ազատության հրապարակից երթով գալիս են դեպի կառավարության շենք։ Նրանց ձեռքերում զոհված որդիների լուսանկարներն են։ Ծնողները պահանջում են ձերբակալել վարչապետ Նիկոլ Փաշինյանին։
«Ժամանակն է, որ պատասխան տաք մեր երեխաներին սպանելու համար։ Միացեք մեզ, անտարբեր մի եղեք, քանի որ անտարբերությունը նոր հանցանքներ է ծնելու»,– ասացին նրանց։
Նրանք կառավարության մոտից պետք է նաև դատախազության մոտ գնան։
«Ուշադիր նայեք մեր տղաների աչքերի մեջ, նրանք զոհվել են, որպեսզի հայրենիքը պահի իր արժանապատվությունը, և այսօր, անտարբեր անցնելով նրանց ծնողների կողքով, ծանր մեղք եք վերցնում ձեր վրա»,–դիմելով հանրությանը` ասաց զոհվածներից մեկի հայրը։
Երթին մասնակցում են նաև Արցախից եկած ծնողներ, ինչպես նաև Արցախի ԱԺ պատգամավոր Մետաքսե Հակոբյանը։ Նա լրագրողների հետ զրույցում ասաց, որ Արցախի դատախազ Գուրգեն Ներսիսյանից հետաքրքրվել է, թե արդյոք Արցախում էլ Նիկոլ Փաշինյանի հայտարարության հետ կապված վարույթ չի սկսվելու։ Ներսիսյանը պատասխանել է` տարբերություն չկա. եթե ՀՀ–ում լինում է, կարիք չկա։ Սակայն պատգամավորը նշեց, որ Արցախ վերադառնալուն պես կրկին բարձրացնելու է այդ հարցը։
Հասնելով կառավարության շենքի մոտ` ծնողները որոշ ժամանակ մեջքով կանգնեցին այնտեղ և շարժվեցին դեպի դատախազություն։
Հիշեցնենք` 44-օրյա պատերազմում զոհվածների ծնողներն արդեն մի քանի օր է՝ բողոքի ակցիաներ են անում ՀՀ գլխավոր դատախազության շենքի դիմաց։ Նրանք դատախազին էին փոխանցել իրենց ստորագրություններով դիմում-պահանջը 44-օրյա պատերազմի վերաբերյալ քրգործում վարչապետ Նիկոլ Փաշինյանին որպես մեղադրյալ ներգրավելու և իրենց տուժող ճանաչելու մասին։
Ապրիլի 28-ին դատախազությունից ծնողներին հայտնել են, որ միջնորդությունն ուղարկվել է քրգործի վարույթն իրականացնող մարմնին։
Նշենք, որ ծնողների դիմումը վերաբերում է ՀՀ ՀՔԾ-ում 2020թ. նոյեմբերի 21-ին պաշտոնեական լիազորությունները չարաշահելու հատկանիշներով հարուցված քրգործին. քննության առարկա են պատերազմից առաջ և դրա ընթացքում ՀՀ բարձրաստիճան պաշտոնատար անձանց կողմից ենթադրաբար կատարված այնպիսի արարքներ, որոնք բացասական նշանակություն են ունեցել զինված ուժերի մարտունակության հարցում և ազդել են պատերազմի արդյունքի վրա։
Քրգործի նախաքննությունը հանձնված է ՀՀ հակակոռուպցիոն կոմիտեին։
Լրահոս
0