Առնվազն մինիմալ հումանիզմ էր պետք. ՄԻՊ–ն անդրադարձել է հղի կնոջը վրաերթի ենթարկելու դեպքին

Քրիստինե Գրիգորյան - Sputnik Արմենիա, 1920, 03.05.2022
Բաժանորդագրվեք
Yandex newsTelegram
ՀՀ ՄԻՊ Քրիստինե Գրիգորյանը նշեց, որ ամբողջ աշխարհում պետական պաշտոնյաներին ուղեկցող ծառայությունների գործառույթը չընկալվածության հարց ունի։ Հայաստանում դա որևէ կանոնով կարգավորված չէ։
ԵՐԵՎԱՆ, 3 մայիսի – Sputnik. Ցավալի էր տեսնել , որ ՀՀ վարչապետին ուղեկցող ծառայությունը երիտասարդ հղի կնոջը վրաերթի ենթարկելուց հետո ուղղակի չի կանգնում։
Մամուլի ազատության համաշխարհային օրվա առթիվ ԶԼՄ-ների ներկայացուցիչների հետ հարցուպատասխանի ձևաչափով հանդիպման ընթացքում այս մասին հայտարարեց ՀՀ ՄԻՊ Քրիստինե Գրիգորյանը։
Նա նշեց, որ ողբերգական դեպքի օրերին ինքը գործուղման մեջ էր և շատ խիտ գրաֆիկով հանդիպումներ է ունեցել։ Առաջին արձագանքը` որպես մարդու իրավունքների պաշտպան, եղել է այն, որ մեղավորները բացահայտվեն։ Այս առումով ՄԻՊ գրասենյակը նույն օրը գրություն է ուղարկել գլխավոր դատախազություն` քրգործի մանրամասներին տեղեկանալու համար։
«Ինձ համար, որպես մարդ, որը զբաղվել է նաև ոստիկանության բարեփոխումներով և անդրադարձել ուղեկցող ծառայության առանձնահատկություններին ֆունկցիոնալության տեսակետից ... դա առնվազն մինիմալ հումանիզմ էր առաջին հերթին օգնություն ցույց տալու, հնարավորության դեպքում կնոջ ու երեխայի կյանքը փրկելու համար»,–ասաց Գրիգորյանը։
Նա նշեց, որ ամբողջ աշխարհում ուղեկցող ծառայությունների գործառույթը չընկալվածության խնդիր ունի։ Հայաստանում դա որևէ կանոնով կարգավորված չէ։
Նրա խոսքով`ցավալի է, որ հանրությանն շրջանում չհարգվեց նաև ընտանիքի զգայունությունը, և դեպքը դարձավ էժան քննարկումների թեմա։
Ձերբակալվել է հղի կնոջը վրաերթի ենթարկած ոստիկանը. ՔԿ-ն մանրամասներ է հայտնում
Գրիգորյանը նշեց` ՄԻՊ գրասենյակը հետամուտ է լինելու, որ մեղավոր անձը ենթարկվի պատասխանատվության։
Հիշեցնենք` ապրիլի 26-ին` ժամը 18:05-ի սահմաններում, Երևանի Լեո-Պարոնյան փողոցների խաչմերուկի մոտ ոստիկանության ՃՈ ծառայության ուղեկցող սպայական վաշտի հրամանատարը «Տոյոտա Պրադո» մեքենայով վրաերթի է ենթարկել հղի կնոջը։ Նա տեղափոխվել է «Նաիրի» բժշկական կենտրոն, որտեղ, գիտակցության չգալով, մահացել է։
Վարորդը դեպքից հետո թողել է պատահարի վայրը և հեռացել, սակայն ժամը 20:05-ին վերադարձել է և մասնակցել կատարվող քննչական գործողություններին:
Դեպքի առթիվ քրեական գործ է հարուցվել ՀՀ քրեական օրենսգրքի 242-րդ հոդվածի 2-րդ մասով (ճանապարհային երթևեկության և տրանսպորտային միջոցների շահագործման կանոնները խախտելը) և 244-րդ հոդվածի 1-ին մասով (ճանապարհատրանսպորտային պատահարի վայրը թողնելը)։
Լրահոս
0