Фон для радио  - Sputnik Արմենիա, 1920
ՌԱԴԻՈ

Առաջնորդները ծնվում են հրապարակներում․ Աշոտյանը՝ ընդդիմության հավանական առաջնորդի մասին

Առաջնորդները ծնվում են հրապարակներում․ Աշոտյանը՝ ընդդիմության հավանական առաջնորդի մասին
Բաժանորդագրվեք
Yandex newsTelegram
ՀՀԿ փոխնախագահ Արմեն Աշոտյանը Sputnik Արմենիայի եթերում խոսել է ընդդիմության շարժման և դրա հասցեին հնչած քննադատությունների մասին։
Ընդդիմության շարժումից կարող է լինել երկու տեսակի ելք՝ «սև կարապ» կամ այս պայքարի տրամաբանական հաջորդական պայքարի շարունակություն։ Ընդդիմադիրներն ուզում են, որ երկիրը մնա անցնցում, որպեսզի Նիկոլ Փաշինյանին փոխելուց հետո չառաջանան սպիներ և խոցեր, որոնք պետք է բուժել, քանի որ Հայաստանն այնքան խնդիր ունի արտաքին անվտանգային հարցերում, որ իրավունք չունենք հարված հասցնելու կամ հարցականի տակ դնելու հայկական պետականությունը։ Sputnik Արմենիայի հետ զրույցում ընդդիմության ակցիաների մասին խոսելիս այսպիսի տեսակետ հայտնեց Հայաստանի Հանրապետական կուսակցության փոխնախագահ Արմեն Աշոտյանը։
Որոշ վերլուծաբաններ ու քաղաքացիներ քննադատում են ընդդիմությանն անհնազանդության այնպիսի տեխնոլոգիաներ կիրառելու համար, որպիսիք 2018-ին կիրառում էր Փաշինյանը։
Աշոտյանը նշում է, որ դրանք դասական տեխնոլոգիաներ են, որոնք նաև կիրառել է Փաշինյանը, դրանց հեղինակային իրավունքը նրանը չէ, դրանք տարիների ընթացքում մշակված տեխնոլոգիաներ են։
«Այս համաժողովրդական շարժման համար այնպես չէ, որ դրսից տեխնոլոգներ են հրավիրել, ինչպես Նիկոլի հետևից աշխատում էին, դրա համար, այո՛, կարող են լինել նաև սխալներ։ Եթե լիներ մարդ, որն իմանար՝ ինչպես պետք է չեզոքացվեն դժգոհությունները և այդ ամենը փորձեր կյանքի կոչել, ապա այդ մարդիկ կլինեին ցկյանս պաշտոնավարող։ Այդպիսի փորձեր համաշխարհային պատմության մեջ եղել են։ Դրանք ավտորիատար կամ անգամ տոտալիատար կառավարիչներ են, որոնց վերջը, ինչպես տեսանք, օրինակ, Քադաֆիի դեպքում, այդքան էլ լավը չէ»,- նշեց Աշոտյանը։
Հարցին՝ երբ կարելի է ակնկալել ընդդիմության շարժման հանգրվանը, Աշոտյանը պատասխանեց, որ 90-րոպեանոց ֆուտբոլային խաղ չէ, որ ասենք՝ ունենք ընդամենը 90 րոպե, պետք է դրա շրջանակներում ավարտենք։
«Այո՛, պետք է շուտ վերջացնել այս պրոցեսը, որովհետև մեր երկրի առջև ծառացած մարտահրավերները շատ են ու արդիական, բայց հայ ժողովրդի խաղը չի ավարտվելու, նրա համար լինելու են լրացուցիչ խաղակեսեր, որովհետև Նիկոլն է ուզում խաղը վերջացնել, այսպես ասած, այս 90 րոպեի մեջ։ Այդ Նիկոլն ու իր ուսապարկերն են այդքան անբարո, որ պատրաստ են ոտք դնել ու կոխրճել կարմիր գծերը»,- մեկնաբանեց Աշոտյանը։
Աշոտյանը Sputnik Արմենիայի եթերում պատասխանեց նաև շատերին հուզող հարցին՝ ի վերջո ո՞վ է ընդդիմության հավանական թեկնածուն որպես լիդեր, կա՞ արդյոք որոշված մեկը։
Նրա խոսքով` լիդերը ծնվում է շարժումից, առաջնորդները ծնվում են հրապարակում, եթե հիմա լիներ հստակ մեկը, մարդիկ կասեին «ամբողջը դրա համար էր արվում, նրան էին ուզում բերել իշխանության»։
«Առաջնորդներ ծնելու է ժողովուրդը, նա փրկիչներ այլևս չպետք է փնտրի, փրկիչն ու առաջնորդը տարբեր բաներ են, առաջնորդները ծնվելու են այս հրապարակում։ Նոր փրկիչ պետք չէ, քանի որ 1700 տարի առաջ Հայաստանը մի փրկչին ընդունել է, մնացած բոլոր փրկիչները կեղծ մարգարեներ են, որոնք բացառապես մեզ տանում են դեպի դժոխք, ինչպես տեսանք Նիկոլի դեպքում»,- հավելեց Աշոտյանը։
Հիշեցնենք, որ ապրիլի 25-ից խորհրդարանական և ոչ խորհրդարանական ընդդիմադիր ուժերը Հայաստանում սկսել են զանգվածային բողոքի ակցիաներ ու ցույցեր։ Մայիսի 1-ին մեկնարկել է անհնազանդության նոր փուլը, որից հետո ընդդիմադիրները փակել են Երևանի Ֆրանսիայի հրապարակն ու ամեն օր գիշերում են այնտեղ, երկրում անընդհատ փողոցներ են փակվում ու լինում են բախումներ ոստիկանների ու ցուցարարների միջև։
Լրահոս
0