Համոզված եմ, որ ջանք չեք խնայի. Սանոսյանը ներկայացրել է Վանաձորի ղեկավարի պաշտոնակատարին
16:19 15.05.2022 (Թարմացված է: 16:21 15.05.2022)
© Photo : Facebook / Վանաձորի Համայնքապետարան
Բաժանորդագրվել
ԵՐԵՎԱՆ, 15 մայիսի - Sputnik. Տարածքային կառավարման և ենթակառուցվածքների նախարար Գնել Սանոսյանը Վանաձոր համայնքի ղեկավարի նորանշանակ պաշտոնակատար Արկադի Փելեշյանին ներկայացրել է Վանաձոր համայնքի ավագանու անդամներին և համայնքապետարանի աշխատակազմին։ Տեղեկությունը հայտնում է Վանաձորի համայնքապետարանը։
Նախարարն իր խոսքում շնորհակալություն է հայտնել համայնքապետարանի աշխատակազմին՝ ստեղծված բարդ իրավիճակում աշխատանքները կազմակերպելու համար։
«Արդեն ունենք ժամանակավոր պաշտոնակատար, ով քաղաքը կղեկավարի այնքան ժամանակ, մինչև բուն իրավական գործընթացները կկարգավորվեն... Հասկանում եմ, որ չափազանց բարդ ժամանակահատված է, շատ պարտավորություններ և անելիքներ կան, որոնք նշված խնդիրների պատճառով չեն իրականացվել»,–ասել է Սանոսյանը։
Գնել Սանոսյանը Վանաձոր համայնքի ղեկավարի նորանշանակ պաշտոնակատար Արկադի Փելեշյանին ներկայացրել է Վանաձոր համայնքի ավագանու անդամներին և համայնքապետարանի աշխատակազմին։
© Photo : Facebook / Վանաձորի Համայնքապետարան
Նա հույս է հայտնել, որ Փելեշյանը առաջ եկած խնդիրները իրավական հնարավորությունների պարագայում արագ կկարգավորի։
«Համոզված եմ, որ ջանք ու եռանդ չեք խնայի քաղաքի առջև ծառացած խնդիրները կարգավորելու համար»,–ասել է նա։
Իր հերթին Փելեշյանը շնորհակալություն է հայտնել ՀՀ վարչապետին՝ վստահության համար՝ հավաստիացնելով, որ քաջատեղյակ լինելով համայնքի խնդիրներին՝ իր լիազորությունների սահմաններում ջանք չի խնայի դրանց արդյունավետ լուծման համար։
Հիշեցնենք` ԱԺ-ն ապրիլի 1-ի արտահերթ նիստում «Տեղական ինքնակառավարման մասին» օրենքում ՔՊ–ի առաջարկով լրացում էր կատարել։
Այդ փոփոխությամբ ՀՀ վարչապետին իրավունք է տրվել համայնքի ղեկավարի պաշտոնակատար նշանակել այն դեպքում, եթե նորընտիր ավագանին համայնքի ղեկավարի ընտրություն չի իրականացնում օրենքով նախատեսված 20 օրվա ընթացքում։
Գնել Սանոսյանը Վանաձոր համայնքի ղեկավարի նորանշանակ պաշտոնակատար Արկադի Փելեշյանին ներկայացրել է Վանաձոր համայնքի ավագանու անդամներին և համայնքապետարանի աշխատակազմին։
© Photo : Facebook / Վանաձորի Համայնքապետարան
ՀՀ վարչապետ Նիկոլ Փաշինյանի որոշմամբ մայիսի 13–ին Արկադի Փելեշյանը նշանակվեց Վանաձոր համայնքի ղեկավարի պաշտոնակատար:
2021 թվականի դեկտեմբերի 5-ին Վանաձորում առավելագույն ձայներ է ստացել «Մամիկոն Ասլանյան» դաշինքը: Դաշինքի օգտին քվեարկել է 12 814 ընտրող (45%): Դեկտեմբերի 17-ին պետք է տեղի ունենար ընտրված ավագանու անդրանիկ նիստն ու համայնքի ղեկավարի ընտրությունը։ Բայց դրանից մեկ օր առաջ Մամիկոն Ասլանյանը ձերբակալվել, ապա կալանավորվել էր։
Նրան մեղադրանք է առաջադրվել պաշտոնեական լիազորությունները չարաշահելու, պաշտոնեական լիազորություններն անցնելու, պաշտոնեական կեղծիքի հատկանիշներով։
Մամիկոն Ասլանյանն իրեն առաջադրված մեղադրանքը չի ընդունում, փաստաբաններն էլ պնդում են՝ նրա նկատմամբ քաղաքական հետապնդում է իրականացվում։
