Երևանում ճանապարհը փլուզվել է շինարարական նորմերը չպահպանելու հետևանքով. քաղաքապետարան

© Photo : official site of MES of RA Փլուզում Երևանի Լենինգրադյան փողոցից դեպի Ծիծեռնակաբերդի խճուղի տանող հատվածում
Փլուզում Երևանի Լենինգրադյան փողոցից դեպի Ծիծեռնակաբերդի խճուղի տանող հատվածում  - Sputnik Արմենիա, 1920, 20.05.2022
Բաժանորդագրվեք
Yandex newsTelegram
Դեռևս հայտնի չէ, թե որքան ժամանակ կպահանջվի ճանապարհի վերականգնման և նորոգման համար:
ԵՐԵՎԱՆ, 20 մայիսի - Sputnik. Երևանի Լենինգրադյան փողոցից դեպի Ծիծեռնակաբերդի խճուղի տանող հատվածում ճանապարհի փլուզումը տեղի է ունեցել շինարարական նորմերը չպահպանելու և ամրաշինական աշխատանքներ չիրականացնելու հետևանքով։ Այս մասին Sputnik Արմենիային հայտնեց Երևանի քաղաքապետարանի լրատվության վարչության պետ Լևոն Սարդարյանը։
Նա շեշտեց, որ ամրացման աշխատանքներ կատարելն ամբողջությամբ շինարարություն իրականացնող ընկերության պարտականությունների տիրույթում է:
«Նորմերի նման խախտման և վերջին շրջանում անոմալ տեղումների արդյունքում ճանապարհին հարակից գրունտը թուլացել է, ինչի հետևանքով տեղի է ունեցել փլուզում»,–ասաց Սարդարյանը:
Նա նշեց, որ այս պահին դեռ հայտնի չէ, թե որքան ժամանակ կպահանջվի ճանապարհի վերականգնման և նորոգման համար:
Մասնագիտական խմբերն առաջիկա օրերին համապատասխան եզրակացությունը կներկայացնեն Երևանի քաղաքապետարան։
Հավելենք, որ Sputnik Արմենիայի տեղեկություններով` նշված հատվածում շինարարական աշխատանքներ է իրականացնում «Սահակյանշին» ՓԲԸ–ն։
Հիշեցնենք` Երևանի Լենինգրադյան փողոցից դեպի Ծիծեռնակաբերդի խճուղի տանող հատվածում այսօր տեղի է ունեցել հողաշերտի փլվածք, որն ուղեկցվել է ավտոճանապարհից մոտ 22 քմ հատվածի և երկաթբետոնե հենապատի փլուզումով։
Արդյունքում երկու արտաքին լուսավորման սյուն շրջվել է, վնասվել են մալուխներ և կոյուղատար խողովակ, առկա է ճանապարհահատվածի կրկին փլուզման վտանգ։ Տուժածներ չկան, սակայն Ծիծեռնակաբերդի խճուղին երկկողմանի փակվել է։
Լրահոս
0