Ուզում է իրեն արդարացնելու հիմք ստեղծել. Ռուստամյանի արձագանքը Փաշինյանին

© Sputnik / Aram NersesyanԱրմեն Ռուստամյան
Արմեն Ռուստամյան - Sputnik Արմենիա, 1920, 26.05.2022
Բաժանորդագրվեք
НовостиTelegram
Ընդդիմադիր պատգամավորն անդրադարձավ Նիկոլ Փաշինյանի այն հայտարարությանը, թե նախկին իշխանությունները 2007թ.–ին Մադրիդյան սկզբունքներով Ադրբեջանին վետոյի իրավունք են տվել ԼՂ կարգավիճակի որոշման հարցում։
ԵՐԵՎԱՆ, 26 մայիսի – Sputnik. Այս իշխանությունները բանակցային գործընթացում մեր դիրքերը պաշտպանելու ձևը չեն գտել։ Լրագրողների հետ զրույցում նման կարծիք հայտնեց «Հայաստան» խմբակցության պատգամավոր Արմեն Ռուստամյանը` անդրադառնալով վարչապետ Նիկոլ Փաշինյանի` երեկ ԱԺ–ում արած հայտարարությանը։
Նշենք, որ Փաշինյանն ասել էր` նախկին իշխանությունները 2007թ.–ին Մադրիդյան սկզբունքներով Ադրբեջանին վետոյի իրավունք են տվել ԼՂ կարգավիճակի որոշման հարցում։
«Մադրիդյան սկզբունքներն ինքնին փոխզիջումային մի փաստաթուղթ էր, ինչը ենթադրում էր նաև մեր կողմից էլ զիջում։ Մենք այդ առումով շատ գրագետ քայլ ենք արել` ասելով, որ կարելի է ևս մեկ հանրաքվե անցկացնել Արցախում, քանի որ վստահ էինք, որ դրա արդյունքը նույնն է լինելու, ինչ 1991-ին էր»,–ասաց Ռուստամյանը։
Նրա խոսքով` եթե իշխանության չոր տրամաբանությամբ նայեն, ապա ընդհանրապես բանակցությունների մեջ չպետք է մտնեին։
Ռուստամյանը նշում է, որ դրանով ԼՂ ժողովրդի ինքնորոշման իրավունքն էր ճանաչվում, եթե հանրաքվե լիներ։ Նա նկատեց նաև, որ եթե Մադրիդյան սկզբունքներով Ադրբեջանին վետոյի իրավունք էր տալու ԼՂ կարգավիճակի որոշման հարցում, ապա ինչո՞ւ Ադրբեջանը չհամաձայնեց բանակցել դրա շուրջ։
«Փաշինյանն ուզում է ասել, որ ինքը մեղավոր չէ, և նորից ամեն ինչի մեղքը բարդել նախկինների վրա, այսինքն` ուզում է իրեն արդարացնելու համար հիմք ստեղծել»,–ասաց Ռուստամյանը։
Հիշեցնենք, որ Մադրիդյան սկզբունքները կողմերին առաջարկվել են 2007 թվականի նոյեմբերի 29-ին, ԵԱՀԿ ՄԽ համանախագահների կողմից ՝ որպես Լեռնային Ղարաբաղի հակամարտության խաղաղ կարգավորման հիմնարար սկզբունքներ։
Հետագա պաշտոնական հայտարարությունների համաձայն, Մադրիդյան սկզբունքները չեն արժանացել կողմերի հավանությանը, բայց նրանց կողմից հիմք են ընդունվել բանակցային գործընթացի համար։
Լրահոս
0