15 կուսակցություններ զորակցություն են հայտնել ԱԺ ընդդիմության հայտարարությանը
15:48 02.06.2022 (Թարմացված է: 16:25 02.06.2022)
Բաժանորդագրվել
Ընդդիմադիրները կոչ են անում բոլոր քաղաքական ուժերին համախմբվել հայ ժողովրդի ազգային պետական շահերն արտացոլող օրակարգերի շուրջ:
ԵՐԵՎԱՆ, 2 հունիսի – Sputnik. Հայաստանի 15 կուսակցություններ իրենց զորակցությունն են հայտնում ԱԺ ընդդիմության հայտարարությանը, որում, ըստ ընդդիմադիրերի, արտացոլված է հայ ժողովրդի և հայոց պետականության լինելության հարցը։ Հայտարարությունը ֆեյսբուքյան իր էջում հրապարակել է ԱԺ փոխխոսնակ, «Դիմադրություն» շարժման ղեկավարներից Իշխան Սաղաթելյանը։
Նշվում է, որ գործող իշխանությունների որդեգրած հակասահմանադրական ընթացքը փաստացի մենիշխանության է տարել երկիրը։
«Ազգային ժողովում, երկրի համար օրհասական այս իրավիճակում, քաղաքական մեծամասնության կողմից մերժվում են ազգային-պետական շահերին առնչվող կարևորագույն քննարկումներն ու որոշումների կայացումը։ Գնալով խորանում են Հայաստանի պետականությանն ու ազգային անվտանգությանն ուղղված սպառնալիքները, անտեսվում են հայ ժողովրդի կենսական շահերը՝ երկիրը կանգնեցնելով պետականության կազմաքանդման շեմին»,-նշված է հայտարարության մեջ։
Ընդդիմության ներկայացուցիչների կարծիքով` կենսական անհրաժեշտություն է «Հայ-ադրբեջանական ու հայ-թուրքական հարաբերությունների կապակցությամբ» ԱԺ հայտարարության ընդունումը:
Ընդդիմադիրները կոչ են անում բոլոր քաղաքական ուժերին, հասարակական միավորումներին ու անհատներին համախմբվել հայտարարության սկզբունքների և հայ ժողովրդի ազգային պետական շահերն արտացոլող օրակարգերի շուրջ:
Հայտարարությանը միացել են հետևյալ կուսակցությունները՝
«5165 շարժում» կուսակցություն
«Ազատություն» կուսակցություն
«Ազգային անվտանգություն» կուսակցություն
«Ազգային համաձայնություն» կուսակցություն
ԱԻՄ կուսակցություն
«Երկիր Ծիրանի» կուսակցություն
«Զարթոնք» ազգային քրիստոնեական կուսակցություն
«Ժառանգություն» կուսակցություն
«Ինտելեկտուալ Հայաստան» կուսակցություն
«Համերաշխություն» կուսակցություն
Հայաստանի դեմոկրատական կուսակցություն
«Հայաստանի ժողովրդավարական ազատական միություն» կուսակցություն
«Հայաստանի քրիստոնեա-դեմոկրատական միություն» կուսակցություն
Ռեֆորմիստների կուսակցություն
«Սահմանադրական իրավունք միություն» կուսակցություն
Մայիսի 25-ին հայտնի դարձավ, որ խորհրդարանական երկու ընդդիմադիր խմբակցությունները ՝ «Պատիվ ունեմ»-ը և «Հայաստանը», հանդես են եկել արտահերթ նիստ հրավիրելու նախաձեռնությամբ։ Նրանք առաջարկում են, որ ԱԺ-ն հայտարարությամբ հանդես գա, որում ի թիվս այլ դրույթների նշվի, որ Արցախը երբեք չի եղել ու չի լինելու Ադրբեջանի կազմում։
Այդ հարցով ԱԺ-ում հրավիրվեց արտահերթ նիստ, բայց իշխող «Քաղաքացիական պայմանագիրը» հայտարարեց, որ նիստին չի մասնակցելու։
